ਚੰਡੀਗੜ੍ਹ: ਪੰਜਾਬ ਦੀ ਸਿਆਸਤ ਵਿੱਚ ਬਿਆਨਬਾਜ਼ੀ ਦਾ ਦੌਰ ਇੱਕ ਵਾਰ ਫਿਰ ਗਰਮਾ ਗਿਆ ਹੈ। ਰਵਨੀਤ ਬਿੱਟੂ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਲੈ ਕੇ ਦਿੱਤੇ ਗਏ ਇੱਕ ਵਿਵਾਦਤ ਬਿਆਨ ‘ਤੇ ਆਮ ਆਦਮੀ ਪਾਰਟੀ (AAP) ਦੇ ਸੀਨੀਅਰ ਆਗੂ ਅਤੇ ਮੁੱਖ ਮੰਤਰੀ ਦੇ ਮੀਡੀਆ ਡਾਇਰੈਕਟਰ ਬਲਤੇਜ ਪੰਨੂ ਨੇ ਭਾਜਪਾ ਆਗੂ ਰਵਨੀਤ ਸਿੰਘ ਬਿੱਟੂ ‘ਤੇ ਵੱਡਾ ਪਲਟਵਾਰ ਕੀਤਾ ਹੈ
ਦਰਅਸਲ, ਰਵਨੀਤ ਬਿੱਟੂ ਵੱਲੋਂ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਕਥਿਤ ਤੌਰ ‘ਤੇ ‘ISI ਦਾ ਏਜੰਟ’ ਦੱਸਣ ਤੋਂ ਬਾਅਦ, ਬਲਤੇਜ ਪੰਨੂ ਨੇ ਸੋਸ਼ਲ ਮੀਡੀਆ ਰਾਹੀਂ ਬਿੱਟੂ ਨੂੰ ਘੇਰਦਿਆਂ ਦੇਸ਼ ਵਿੱਚ ਹੋਏ ਵੱਡੇ ਅੱਤਵਾਦੀ ਹਮਲਿਆਂ ਦੀ ਜਾਂਚ ਨੂੰ ਲੈ ਕੇ ਤਿੱਖੇ ਸਵਾਲ ਦਾਗੇ ਹਨ
ਪੰਨੂ ਨੇ ਪੁੱਛੇ 4 ਵੱਡੇ ਸਵਾਲ
ਬਲਤੇਜ ਪੰਨੂ ਨੇ ਰਵਨੀਤ ਬਿੱਟੂ ਨੂੰ ਸਿੱਧਾ ਸਵਾਲ ਕਰਦਿਆਂ ਪੁੱਛਿਆ ਕਿ ਜੇਕਰ ਉਹ ਸੁਰੱਖਿਆ ਏਜੰਸੀਆਂ ਅਤੇ ਦੇਸ਼ ਦੀ ਸੁਰੱਖਿਆ ਦੇ ਇੰਨੇ ਵੱਡੇ ਮਾਹਰ ਬਣ ਰਹੇ ਹਨ, ਤਾਂ ਉਹ ਦੇਸ਼ ਦੇ ਇਨ੍ਹਾਂ ਵੱਡੇ ਹਮਲਿਆਂ ਦੇ ਪਿੱਛੇ ਦਾ ਸੱਚ ਵੀ ਜਨਤਾ ਨੂੰ ਦੱਸਣ। ਪੰਨੂ ਨੇ ਲਿਖਿਆ:
“ਮੁੱਖ ਮੰਤਰੀ ਭਗਵੰਤ ਮਾਨ ਜੀ ਨੂੰ ISI ਦਾ ਏਜੰਟ ਦੱਸਣ ਵਾਲੇ ਰਵਨੀਤ ਬਿੱਟੂ ਜੀ ਦੱਸਣਗੇ ਕਿ – ਪੁਲਵਾਮਾ, ਪਠਾਨਕੋਟ, ਪਹਿਲਗਾਮ ਅਤੇ ਦਿੱਲੀ ਬੰਬ ਧਮਾਕੇ ਦੇ ਹਮਲਿਆਂ ਪਿੱਛੇ ਕੌਣ ਸੀ ਅਤੇ ਇੰਨਾਂ ਦੀ ਜਾਂਚ ਦਾ ਹੁਣ ਤੱਕ ਕੀ ਬਣਿਆ?”
“ਮਾਨ ਸਾਹਿਬ ਨੂੰ ਤੁਹਾਡੇ ਸਰਟੀਫਿਕੇਟ ਦੀ ਲੋੜ ਨਹੀਂ”
ਬਿੱਟੂ ‘ਤੇ ਨਿਸ਼ਾਨਾ ਸਾਧਦੇ ਹੋਏ ਪੰਨੂ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਕਿ ਪੰਜਾਬ ਦੇ ਲੋਕਾਂ ਨੇ ਭਗਵੰਤ ਮਾਨ ਨੂੰ ਭਾਰੀ ਬਹੁਮਤ ਨਾਲ ਮੁੱਖ ਮੰਤਰੀ ਚੁਣਿਆ ਹੈ। ਉਨ੍ਹਾਂ ਦੇ ਦੇਸ਼ ਪ੍ਰੇਮ ਅਤੇ ਇਮਾਨਦਾਰੀ ‘ਤੇ ਸਵਾਲ ਚੁੱਕਣ ਵਾਲੇ ਰਵਨੀਤ ਬਿੱਟੂ ਹੁੰਦੇ ਕੌਣ ਹਨ? ਉਨ੍ਹਾਂ ਕਿਹਾ, “ਮਾਨ ਸਾਹਿਬ ਨੂੰ ਤੁਹਾਡੇ (ਰਵਨੀਤ ਬਿੱਟੂ ਦੇ) ਕਿਸੇ ਸਰਟੀਫਿਕੇਟ ਦੀ ਲੋੜ ਨਹੀਂ ਹੈ।”
ਸੋਸ਼ਲ ਮੀਡੀਆ ‘ਤੇ ਚਰਚਾ ਗਰਮ
ਬਲਤੇਜ ਪੰਨੂ ਦੇ ਇਸ ਬਿਆਨ ਤੋਂ ਬਾਅਦ ਪੰਜਾਬ ਦੀ ਸਿਆਸਤ ਵਿੱਚ ਨਵੀਂ ਚਰਚਾ ਛਿੜ ਗਈ ਹੈ। ‘ਆਪ’ ਸਮਰਥਕਾਂ ਵੱਲੋਂ ਇਸ ਪੋਸਟ ਨੂੰ ਤੇਜ਼ੀ ਨਾਲ ਸ਼ੇਅਰ ਕੀਤਾ ਜਾ ਰਿਹਾ ਹੈ ਅਤੇ ਭਾਜਪਾ ਨੂੰ ਦੇਸ਼ ਦੇ ਵੱਡੇ ਹਮਲਿਆਂ ਦੀ ਸੁਰੱਖਿਆ ਚੂਕ ਅਤੇ ਜਾਂਚ ਰਿਪੋਰਟਾਂ ‘ਤੇ ਘੇਰਿਆ ਜਾ ਰਿਹਾ ਹੈ। ਦੇਖਣਾ ਹੋਵੇਗਾ ਕਿ ਬਲਤੇਜ ਪੰਨੂ ਵੱਲੋਂ ਪੁੱਛੇ ਗਏ ਇਨ੍ਹਾਂ ਸਿੱਧੇ ਸਵਾਲਾਂ ‘ਤੇ ਹੁਣ ਰਵਨੀਤ ਬਿੱਟੂ ਜਾਂ ਭਾਜਪਾ ਵੱਲੋਂ ਕੀ ਪ੍ਰਤੀਕਿਰਿਆ ਆਉਂਦੀ ਹੈ
