ਦੇਸ਼ ਦੇ ਪੰਜਵੇਂ ਸਭ ਤੋਂ ਵੱਡੇ ਐਕਸਪ੍ਰੈਸਵੇਅ, ਦਿੱਲੀ-ਅੰਮ੍ਰਿਤਸਰ-ਕਟੜਾ ਐਕਸਪ੍ਰੈਸਵੇਅ ਦੀ ਉਡੀਕ ਕਰ ਰਹੇ ਲੋਕਾਂ ਲਈ ਅਹਿਮ ਖ਼ਬਰ ਹੈ। ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ (NHAI) ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਬੁੱਧਵਾਰ ਨੂੰ ਇੱਕ ਏਜੰਸੀ ਨੂੰ ਜਾਣਕਾਰੀ ਦਿੱਤੀ ਕਿ ਇਹ ਪ੍ਰੋਜੈਕਟ ਮਾਰਚ 2027 ਤੱਕ ਮੁਕੰਮਲ ਕਰ ਲਿਆ ਜਾਵੇਗਾ
ਦੂਰੀ ਅਤੇ ਸਮੇਂ ਵਿੱਚ ਹੋਵੇਗੀ ਵੱਡੀ ਕਟੌਤੀ
ਇਸ ਐਕਸਪ੍ਰੈਸਵੇਅ ਦੇ ਚਾਲੂ ਹੋਣ ਨਾਲ ਦਿੱਲੀ ਅਤੇ ਕਟੜਾ ਵਿਚਕਾਰ ਦੂਰੀ 727 ਕਿਲੋਮੀਟਰ ਤੋਂ ਘਟ ਕੇ 588 ਕਿਲੋਮੀਟਰ ਰਹਿ ਜਾਵੇਗੀ। ਸਭ ਤੋਂ ਵੱਡੀ ਰਾਹਤ ਸਮੇਂ ਦੀ ਹੋਵੇਗੀ; ਜੋ ਸਫ਼ਰ ਪਹਿਲਾਂ 14 ਘੰਟਿਆਂ ਵਿੱਚ ਤੈਅ ਹੁੰਦਾ ਸੀ, ਉਹ ਹੁਣ ਮਹਿਜ਼ 6 ਘੰਟਿਆਂ ਵਿੱਚ ਪੂਰਾ ਹੋ ਸਕੇਗਾ।
ਧਾਰਮਿਕ ਅਤੇ ਰਣਨੀਤਕ ਪੱਖੋਂ ਅਹਿਮ
NHAI ਜੰਮੂ ਦੇ ਪ੍ਰੋਜੈਕਟ ਡਾਇਰੈਕਟਰ ਰਾਜੀਵ ਕੁਮਾਰ ਨੇ ਦੱਸਿਆ ਕਿ ਇਹ ਐਕਸਪ੍ਰੈਸਵੇਅ ਇੱਕ ‘ਧਾਰਮਿਕ ਕਾਰੀਡੋਰ’ ਵਜੋਂ ਵਿਕਸਤ ਕੀਤਾ ਜਾ ਰਿਹਾ ਹੈ।
ਇਹ ਸ੍ਰੀ ਅੰਮ੍ਰਿਤਸਰ ਸਾਹਿਬ ਵਿਖੇ ਸ੍ਰੀ ਹਰਿਮੰਦਰ ਸਾਹਿਬ ਅਤੇ ਜੰਮੂ-ਕਸ਼ਮੀਰ ਦੇ ਮਾਤਾ ਵੈਸ਼ਨੋ ਦੇਵੀ ਦਰਬਾਰ ਨੂੰ ਆਪਸ ਵਿੱਚ ਜੋੜੇਗਾ। ਅੰਤਰਰਾਸ਼ਟਰੀ ਸਰਹੱਦ ਦੇ ਸਮਾਨਾਂਤਰ ਹੋਣ ਕਾਰਨ, ਇਹ ਰਣਨੀਤਕ ਤੌਰ ‘ਤੇ ਬਹੁਤ ਮਹੱਤਵਪੂਰਨ ਹੈ। ਇਹ ਰੱਖਿਆ ਬਲਾਂ ਦੀ ਤੇਜ਼ੀ ਨਾਲ ਤਾਇਨਾਤੀ ਅਤੇ ਆਵਾਜਾਈ ਵਿੱਚ ਮਦਦਗਾਰ ਸਾਬਤ ਹੋਵੇਗਾ
ਚੁਣੌਤੀਆਂ ਭਰਿਆ ਰਿਹਾ ਨਿਰਮਾਣ ਕਾਰਜ
ਅਧਿਕਾਰੀ ਅਨੁਸਾਰ ਪਿਛਲੇ ਸਾਲ ਕਈ ਵੱਡੀਆਂ ਰੁਕਾਵਟਾਂ ਦਾ ਸਾਹਮਣਾ ਕਰਨਾ ਪਿਆ:
ਆਪ੍ਰੇਸ਼ਨ ਸਿੰਦੂਰ: ਸੁਰੱਖਿਆ ਕਾਰਨਾਂ ਕਰਕੇ ਕੰਮ ਦੀ ਗਤੀ ਪ੍ਰਭਾਵਿਤ ਹੋਈ। ਉੱਤਰੀ ਭਾਰਤ ਵਿੱਚ ਭਾਰੀ ਮੀਂਹ ਅਤੇ ਹੜ੍ਹਾਂ ਕਾਰਨ ਦੋ ਪੁਲ ਵਹਿ ਗਏ ਅਤੇ ਸਪਲਾਈ ਲਾਈਨਾਂ ਪ੍ਰਭਾਵਿਤ ਹੋਈਆਂ। ਸੁਰੱਖਿਆ ਸਥਿਤੀਆਂ ਕਾਰਨ ਕਈ ਕਾਮੇ ਕੰਮ ਛੱਡ ਗਏ ਸਨ, ਜਿਨ੍ਹਾਂ ਨੂੰ ਮੁੜ ਵਾਪਸ ਲਿਆਂਦਾ ਗਿਆ।
ਆਧੁਨਿਕ ਤਕਨਾਲੋਜੀ ਦੀ ਵਰਤੋਂ
ਇਸ ਪ੍ਰੋਜੈਕਟ ਵਿੱਚ ਦਿੱਲੀ ਮੈਟਰੋ ਵਰਗੀ ਆਧੁਨਿਕ ‘ਸੈਗਮੈਂਟਲ ਬ੍ਰਿਜ ਕੰਸਟਰੱਕਸ਼ਨ’ ਤਕਨੀਕ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਜੰਮੂ-ਸਾਂਬਾ ਸੈਕਸ਼ਨ ਵਿੱਚ ਲਗਭਗ 21.5 ਕਿਲੋਮੀਟਰ ਲੰਬਾ ਐਲੀਵੇਟਿਡ ਕਾਰੀਡੋਰ ਬਣਾਇਆ ਜਾ ਰਿਹਾ ਹੈ, ਤਾਂ ਜੋ ਹੇਠਾਂ ਚੱਲ ਰਹੀ ਆਵਾਜਾਈ ਵਿੱਚ ਕੋਈ ਵਿਘਨ ਨਾ ਪਵੇ
ਅਮਰਨਾਥ ਯਾਤਰਾ ਲਈ ਖਾਸ ਤਿਆਰੀ
NHAI ਦਾ ਟੀਚਾ ਹੈ ਕਿ ਆਉਣ ਵਾਲੀ ਸਾਲਾਨਾ ਅਮਰਨਾਥ ਯਾਤਰਾ ਤੋਂ ਪਹਿਲਾਂ ਜੰਮੂ-ਕਠੂਆ ਸਟ੍ਰੈਚ ਦਾ ਲਗਭਗ 30 ਕਿਲੋਮੀਟਰ ਦਾ ਹਿੱਸਾ ਮੁਕੰਮਲ ਕਰ ਲਿਆ ਜਾਵੇ ਤਾਂ ਜੋ ਸ਼ਰਧਾਲੂਆਂ ਨੂੰ ਸਹੂਲਤ ਮਿਲ ਸਕੇ।
“ਇਹ ਐਕਸਪ੍ਰੈਸਵੇਅ ਖੇਤਰੀ ਸੰਪਰਕ ਨੂੰ ਵਧਾਉਣ ਅਤੇ ਸੈਰ-ਸਪਾਟੇ ਨੂੰ ਉਤਸ਼ਾਹਿਤ ਕਰਨ ਵਿੱਚ ਇੱਕ ਇਨਕਲਾਬੀ ਕਦਮ ਹੋਵੇਗਾ।” — ਰਾਜੀਵ ਕੁਮਾਰ, ਪ੍ਰੋਜੈਕਟ ਡਾਇਰੈਕਟਰ, NHAI
