ਵਾਸ਼ਿੰਗਟਨ : ਅਮਰੀਕਾ ਦੇ ਨਵੇਂ ਮੰਤਰੀ (Treasury Secretary) ਸਕਾਟ ਬੇਸੈਂਟ (Scott Bessent) ਦੇ ਇੱਕ ਤਾਜ਼ਾ ਬਿਆਨ ਨੇ ਭਾਰਤ ਦੀ ਸਿਆਸਤ ਅਤੇ ਕੂਟਨੀਤੀ ਵਿੱਚ ਹਲਚਲ ਪੈਦਾ ਕਰ ਦਿੱਤੀ ਹੈ। ਬੇਸੈਂਟ ਨੇ ਦਾਅਵਾ ਕੀਤਾ ਹੈ ਕਿ ਭਾਰਤ ਨੇ ਅਮਰੀਕਾ ਦੇ ਕਹਿਣ ‘ਤੇ ਰੂਸੀ ਤੇਲ ਦੀ ਖਰੀਦ ਰੋਕ ਦਿੱਤੀ ਸੀ ਅਤੇ ਹੁਣ ਅਮਰੀਕਾ ਨੇ ਭਾਰਤ ਨੂੰ ਦੁਬਾਰਾ ਰੂਸੀ ਤੇਲ ਖਰੀਦਣ ਦੀ “ਇਜਾਜ਼ਤ” ਦੇ ਦਿੱਤੀ ਹੈ।
“ਭਾਰਤ ਨੇ ਸਾਡੀ ਗੱਲ ਮੰਨੀ” – ਬੇਸੈਂਟ
ਸ਼ੁੱਕਰਵਾਰ ਨੂੰ ਫੌਕਸ ਬਿਜ਼ਨਸ (Fox Business) ‘ਤੇ ਇੱਕ ਇੰਟਰਵਿਊ ਦੌਰਾਨ ਸਕਾਟ ਬੇਸੈਂਟ ਨੇ ਕਿਹਾ, “ਭਾਰਤੀ ਬਹੁਤ ਚੰਗੇ ਅਦਾਕਾਰ (Actors) ਰਹੇ ਹਨ। ਅਸੀਂ ਉਨ੍ਹਾਂ ਨੂੰ ਰੂਸੀ ਤੇਲ ਖਰੀਦਣਾ ਬੰਦ ਕਰਨ ਲਈ ਕਿਹਾ ਸੀ ਅਤੇ ਉਨ੍ਹਾਂ ਨੇ ਅਜਿਹਾ ਹੀ ਕੀਤਾ। ਉਹ ਇਸ ਦੀ ਜਗ੍ਹਾ ਅਮਰੀਕੀ ਤੇਲ ਲੈਣ ਜਾ ਰਹੇ ਸਨ।”
“Indians have been very good actors. We asked them to stop buying Russian oil, and they did“ ,says Scott Bessent
ਉਨ੍ਹਾਂ ਅੱਗੇ ਕਿਹਾ ਕਿ ਦੁਨੀਆ ਭਰ ਵਿੱਚ ਤੇਲ ਦੀ ਸਪਲਾਈ ਵਿੱਚ ਆਈ ਅਸਥਾਈ ਕਮੀ ਨੂੰ ਦੂਰ ਕਰਨ ਲਈ, ਅਮਰੀਕਾ ਨੇ ਹੁਣ ਭਾਰਤ ਨੂੰ ਰੂਸੀ ਤੇਲ ਖਰੀਦਣ ਦੀ ਇਜਾਜ਼ਤ ਦਿੱਤੀ ਹੈ
ਕਿਉਂ ਦਿੱਤੀ ਗਈ ‘ਇਜਾਜ਼ਤ’?
ਅਮਰੀਕੀ ਖਜ਼ਾਨਾ ਵਿਭਾਗ ਦੇ ਅਨੁਸਾਰ, ਮੱਧ ਪੂਰਬ (ਈਰਾਨ ਨਾਲ ਟਕਰਾਅ) ਕਾਰਨ ਤੇਲ ਦੀਆਂ ਕੀਮਤਾਂ ‘ਤੇ ਪੈ ਰਹੇ ਦਬਾਅ ਨੂੰ ਘਟਾਉਣ ਲਈ ਇਹ ਕਦਮ ਚੁੱਕਿਆ ਗਿਆ ਹੈ
ਇਹ ਇਜਾਜ਼ਤ ਸਿਰਫ 30 ਦਿਨਾਂ (5 ਮਾਰਚ ਤੋਂ 4 ਅਪ੍ਰੈਲ) ਲਈ ਦਿੱਤੀ ਗਈ ਹੈ। ਇਹ ਸਿਰਫ ਉਸ ਤੇਲ ਲਈ ਹੈ ਜੋ ਪਹਿਲਾਂ ਹੀ ਸਮੁੰਦਰੀ ਜਹਾਜ਼ਾਂ ‘ਤੇ ਲੱਦਿਆ ਹੋਇਆ ਹੈ ਅਤੇ ਰਸਤੇ ਵਿੱਚ ਹੈ। ਅਮਰੀਕਾ ਦਾ ਮੰਨਣਾ ਹੈ ਕਿ ਇਸ ਨਾਲ ਰੂਸ ਨੂੰ ਕੋਈ ਵੱਡਾ ਵਿੱਤੀ ਲਾਭ ਨਹੀਂ ਹੋਵੇਗਾ ਕਿਉਂਕਿ ਇਹ ਤੇਲ ਪਹਿਲਾਂ ਹੀ ਸਮੁੰਦਰ ਵਿੱਚ ਫਸਿਆ ਹੋਇਆ ਸੀ।
ਟਰੰਪ ਦੀ ‘ਐਨਰਜੀ ਡੋਮੀਨੈਂਸ’ ਨੀਤੀ
ਬੇਸੈਂਟ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘X’ ‘ਤੇ ਲਿਖਿਆ ਕਿ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ‘ਅਮਰੀਕਨ ਐਨਰਜੀ ਡੋਮੀਨੈਂਸ’ ਨੀਤੀ ਕਾਰਨ ਹੁਣ ਦੁਨੀਆ ਵਿੱਚ ਤੇਲ ਦੀ ਸਪਲਾਈ ਬਿਹਤਰ ਹੈ। ਉਨ੍ਹਾਂ ਭਾਰਤ ਨੂੰ ‘ਮਿੱਤਰ’ ਦੱਸਦਿਆਂ ਕਿਹਾ ਕਿ ਸਪਲਾਈ ਦੇ ਪਾੜੇ ਨੂੰ ਭਰਨ ਲਈ ਇਹ ਥੋੜ੍ਹੇ ਸਮੇਂ ਦਾ ਉਪਾਅ ਹੈ।
ਭਾਰਤ ਵਿੱਚ ਸਿਆਸੀ ਹੰਗਾਮਾ
ਭਾਰਤੀ ਅਧਿਕਾਰੀਆਂ ਨੇ ਅਜੇ ਤੱਕ ਬੇਸੈਂਟ ਦੇ ਇਸ ਬਿਆਨ ‘ਤੇ ਕੋਈ ਅਧਿਕਾਰਤ ਟਿੱਪਣੀ ਨਹੀਂ ਕੀਤੀ ਹੈ। ਹਾਲਾਂਕਿ, ਵਿਰੋਧੀ ਪਾਰਟੀਆਂ ਨੇ ਮੋਦੀ ਸਰਕਾਰ ਨੂੰ ਘੇਰਨਾ ਸ਼ੁਰੂ ਕਰ ਦਿੱਤਾ ਹੈ।
ਵਿਰੋਧੀ ਧਿਰ ਦਾ ਦੋਸ਼ ਹੈ ਕਿ ਪ੍ਰਧਾਨ ਮੰਤਰੀ ਮੋਦੀ ਨੇ ਅਮਰੀਕੀ ਰਾਸ਼ਟਰਪਤੀ ਟਰੰਪ ਅੱਗੇ ਗੋਡੇ ਟੇਕ ਦਿੱਤੇ ਹਨ। ਇਲਜ਼ਾਮ ਲਾਇਆ ਜਾ ਰਿਹਾ ਹੈ ਕਿ ਭਾਰਤ ਦੇ ਰਾਸ਼ਟਰੀ ਹਿੱਤਾਂ ਨੂੰ ਅਮਰੀਕੀ ਦਬਾਅ ਹੇਠ ਗਿਰਵੀ ਰੱਖਿਆ ਗਿਆ ਹੈ
