ਲਖਨਊ: ਉੱਤਰ ਪ੍ਰਦੇਸ਼ ਦੀ ਰਾਜਧਾਨੀ ਲਖਨਊ ਵਿੱਚ ਸ਼ਰਾਬ ਕਾਰੋਬਾਰੀ ਮਾਨਵੇਂਦਰ ਸਿੰਘ ਦੇ ਕਤਲ ਮਾਮਲੇ ਵਿੱਚ ਰੋਜ਼ਾਨਾ ਅਜਿਹੇ ਖੁਲਾਸੇ ਹੋ ਰਹੇ ਹਨ, ਜਿਨ੍ਹਾਂ ਨੇ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰ ਦਿੱਤਾ ਹੈ। ਪਿਤਾ ਦਾ ਕਤਲ ਕਰਨ ਤੋਂ ਬਾਅਦ ਮੁਲਜ਼ਮ ਪੁੱਤਰ ਅਕਸ਼ਤ ਪ੍ਰਤਾਪ ਸਿੰਘ (21) ਦੇ ਚਿਹਰੇ ‘ਤੇ ਪਛਤਾਵੇ ਦੀ ਇੱਕ ਵੀ ਸ਼ਿਕਨ ਨਹੀਂ ਸੀ। ਉਸ ਨੇ ਵਾਰਦਾਤ ਤੋਂ ਬਾਅਦ ਘਰ ਵਿੱਚ ਇੰਨਾ ਆਮ ਮਾਹੌਲ ਬਣਾ ਕੇ ਰੱਖਿਆ ਕਿ ਕਿਸੇ ਨੂੰ ਸ਼ੱਕ ਤੱਕ ਨਹੀਂ ਹੋਣ ਦਿੱਤਾ
ਕਤਲ ਤੋਂ ਬਾਅਦ ਪਨੀਰ ਦੀ ਸਬਜ਼ੀ ਅਤੇ ਮਿਠਾਈ ਦੀ ਪਾਰਟੀ
ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਜਿਸ ਪਿਤਾ ਨੇ ਬੱਚਿਆਂ ਦੀ ਖ਼ਾਤਰ ਦੂਜਾ ਵਿਆਹ ਨਹੀਂ ਕੀਤਾ ਸੀ, ਉਨ੍ਹਾਂ ਦਾ ਖ਼ੂਨ ਕਰਨ ਤੋਂ ਬਾਅਦ ਅਕਸ਼ਤ ਬਾਜ਼ਾਰੋਂ ਪਨੀਰ ਅਤੇ ਮਿਠਾਈ ਖਰੀਦ ਕੇ ਲਿਆਇਆ।
ਚਾਚੀ ਨੇ ਬਣਾਇਆ ਖਾਣਾ: ਅਕਸ਼ਤ ਨੇ ਆਪਣੀ ਚਾਚੀ ਨੂੰ ਪਨੀਰ ਲਿਆ ਕੇ ਦਿੱਤਾ, ਜਿਸ ਨੇ ਖਾਣਾ ਤਿਆਰ ਕੀਤਾ, ਕਤਲ ਤੋਂ ਬਾਅਦ ਅਕਸ਼ਤ ਨੇ ਪਰਿਵਾਰ ਦੇ ਹੋਰ ਮੈਂਬਰਾਂ ਨਾਲ ਬੈਠ ਕੇ ਬੜੇ ਆਰਾਮ ਨਾਲ ਰਾਤ ਦਾ ਖਾਣਾ ਖਾਧਾ ਅਤੇ ਸਭ ਨੂੰ ਮਿਠਾਈ ਵੀ ਖਵਾਈ ਤਾਂ ਜੋ ਕਿਸੇ ਨੂੰ ਕੋਈ ਸ਼ੱਕ ਨਾ ਹੋਵੇ
ਦਹਿਸ਼ਤ ਵਿੱਚ ਪੱਥਰ ਬਣੀ 11ਵੀਂ ਦੀ ਛੋਟੀ ਭੈਣ
ਵਾਰਦਾਤ ਦੇ ਸਮੇਂ ਅਕਸ਼ਤ ਦੀ ਭੈਣ ਕ੍ਰਿਤੀ ਕਮਰੇ ਵਿੱਚ ਹੀ ਸੀ। ਪਿਤਾ ਦੀ ਮੌਤ ਤੋਂ ਬਾਅਦ ਅਕਸ਼ਤ ਨੇ ਆਪਣੀ ਭੈਣ ਨੂੰ ਇੰਨਾ ਡਰਾਇਆ ਕਿ ਉਹ ਖ਼ੌਫ ਦੇ ਮਾਰੇ ਚੁੱਪ ਰਹੀ।
ਡਰ ਦੇ ਸਾਏ ਹੇਠ ਦਿੱਤੀ ਪ੍ਰੀਖਿਆ: 20 ਫਰਵਰੀ ਨੂੰ ਕ੍ਰਿਤੀ ਸਕੂਲ ਪ੍ਰੀਖਿਆ ਦੇਣ ਵੀ ਗਈ, ਪਰ ਉਸ ਨੇ ਨਾ ਤਾਂ ਅਧਿਆਪਕਾਂ ਅਤੇ ਨਾ ਹੀ ਆਪਣੀਆਂ ਸਹੇਲੀਆਂ ਨਾਲ ਕੁਝ ਸਾਂਝਾ ਕੀਤਾ। ਉਹ ਚੁੱਪਚਾਪ ਘਰ ਆ ਕੇ ਭਰਾ ਦੇ ਹੁਕਮਾਂ ਦੀ ਪਾਲਣਾ ਕਰਦੀ ਰਹੀ।
ਅੰਤਿਮ ਸੰਸਕਾਰ ਦਾ ਹੱਕ ਗੁਆਇਆ, ਭਤੀਜੇ ਨੇ ਦਿੱਤੀ ਮੁਖ਼ਾਗਨੀ
ਪਿਤਾ ਦਾ ਕਤਲ ਕਰਨ ਵਾਲੇ ਅਕਸ਼ਤ ਨੇ ਅੰਤਿਮ ਸੰਸਕਾਰ ਦਾ ਹੱਕ ਵੀ ਗੁਆ ਦਿੱਤਾ। ਬੁੱਧਵਾਰ ਨੂੰ ਮਾਨਵੇਂਦਰ ਸਿੰਘ (49) ਦਾ ਅੰਤਿਮ ਸੰਸਕਾਰ ਬੈਕੁੰਠ ਧਾਮ ਵਿਖੇ ਕੀਤਾ ਗਿਆ, ਜਿੱਥੇ ਉਨ੍ਹਾਂ ਦੇ ਭਰਾ ਦੇ ਪੁੱਤਰ ਕ੍ਰਿਤ ਸਿੰਘ ਨੇ ਮੁਖ਼ਾਗਨੀ ਦਿੱਤੀ। ਮ੍ਰਿਤਕ ਦੀ ਬਜ਼ੁਰਗ ਮਾਂ ਵਾਰ-ਵਾਰ ਬੇਹੋਸ਼ ਹੋ ਰਹੀ ਸੀ ਅਤੇ ਪੂਰੀ ਕਲੋਨੀ ਵਿੱਚ ਮਾਤਮ ਦਾ ਮਾਹੌਲ ਸੀ
ਕੀ ਸੀ ਪੂਰਾ ਮਾਮਲਾ?
ਵਿਵਾਦ ਦੀ ਵਜ੍ਹਾ: ਪਿਤਾ ਮਾਨਵੇਂਦਰ ਸਿੰਘ ਆਪਣੇ ਪੁੱਤਰ ‘ਤੇ NEET (ਨੀਟ) ਦੀ ਤਿਆਰੀ ਲਈ ਦਬਾਅ ਪਾ ਰਹੇ ਸਨ। 20 ਫਰਵਰੀ ਨੂੰ ਸਵੇਰੇ 4:30 ਵਜੇ ਬਹਿਸ ਤੋਂ ਬਾਅਦ ਅਕਸ਼ਤ ਨੇ ਪਿਤਾ ਦੀ ਲਾਇਸੈਂਸੀ ਰਾਈਫਲ ਨਾਲ ਉਨ੍ਹਾਂ ਨੂੰ ਗੋਲੀ ਮਾਰ ਦਿੱਤੀ।
ਲਾਸ਼ ਦੇ ਕੀਤੇ ਟੁਕੜੇ: ਲਾਸ਼ ਭਾਰੀ ਹੋਣ ਕਾਰਨ ਅਕਸ਼ਤ ਉਸ ਨੂੰ ਇਕੱਲਾ ਕਿਤੇ ਸੁੱਟ ਨਹੀਂ ਸਕਿਆ। ਇਸ ਲਈ ਉਹ ਆਰੀ ਖਰੀਦ ਕੇ ਲਿਆਇਆ ਅਤੇ ਲਾਸ਼ ਦੇ ਟੁਕੜੇ ਕਰ ਦਿੱਤੇ। ਹੱਥ ਅਤੇ ਪੈਰ ਉਸ ਨੇ ਬਾਹਰ ਸੁੱਟ ਦਿੱਤੇ, ਜਦਕਿ ਸਿਰ ਅਤੇ ਧੜ ਇੱਕ ਨੀਲੇ ਰੰਗ ਦੇ ਡਰੰਮ ਵਿੱਚ ਪਾ ਕੇ ਘਰ ਦੇ ਅੰਦਰ ਹੀ ਛੁਪਾ ਦਿੱਤੇ
ਪੁਲਿਸ ਨੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਅਤੇ ਮਾਮਲੇ ਦੀ ਅਗਲੀ ਜਾਂਚ ਜਾਰੀ ਹੈ
