ਤੇਹਰਾਨ : ਈਰਾਨ ਦੇ ਮਰਹੂਮ ਸਰਵਉੱਚ ਆਗੂ ਅਯਾਤੁੱਲਾ ਅਲੀ ਖ਼ਮੇਨੇਈ ਨੂੰ ਅੰਤਿਮ ਵਿਦਾਇਗੀ ਦੇਣ ਲਈ ਅੱਜ ਬੁੱਧਵਾਰ ਰਾਤ ਨੂੰ ਤੇਹਰਾਨ ਵਿੱਚ ਇੱਕ ਵਿਸ਼ੇਸ਼ ਸਮਾਗਮ ਕਰਵਾਇਆ ਜਾ ਰਿਹਾ ਹੈ। ਈਰਾਨੀ ਸਰਕਾਰੀ ਮੀਡੀਆ ਅਨੁਸਾਰ, ਦੇਸ਼ ਦੇ ਲੋਕ ਆਪਣੇ ਰਹਿਬਰ ਨੂੰ ਸ਼ਰਧਾਂਜਲੀ ਦੇਣ ਲਈ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋ ਰਹੇ ਹਨ।
ਤਿੰਨ ਦਿਨਾਂ ਤੱਕ ਜਾਰੀ ਰਹੇਗੀ ਅੰਤਿਮ ਵਿਦਾਇਗੀ
ਈਰਾਨ ਦੀ ਇਸਲਾਮਿਕ ਪ੍ਰੋਪੇਗੇਸ਼ਨ ਕੌਂਸਲ ਦੇ ਮੁਖੀ, ਹੁਜਤੁਲ ਇਸਲਾਮ ਮਹਿਮੂਦੀ ਨੇ ਦੱਸਿਆ ਕਿ ਅੰਤਿਮ ਵਿਦਾਇਗੀ ਦੀ ਰਸਮ ਬੁੱਧਵਾਰ ਰਾਤ 10 ਵਜੇ (ਸਥਾਨਕ ਸਮਾਂ) ਤੇਹਰਾਨ ਦੇ ਇਮਾਮ ਖ਼ੁਮੈਨੀ ਪ੍ਰਾਰਥਨਾ ਹਾਲ (ਮੋਸੱਲਾ) ਵਿਖੇ ਸ਼ੁਰੂ ਹੋਵੇਗੀ। ਇਹ ਸਿਲਸਿਲਾ ਲਗਾਤਾਰ ਤਿੰਨ ਦਿਨਾਂ ਤੱਕ ਜਾਰੀ ਰਹੇਗਾ
ਮਹਿਮੂਦੀ ਨੇ ਕਿਹਾ:
“ਮੋਸੱਲਾ (ਪ੍ਰਾਰਥਨਾ ਹਾਲ) ਸ਼ਰਧਾਲੂਆਂ ਲਈ ਖੁੱਲ੍ਹਾ ਰਹੇਗਾ। ਲੋਕ ਇੱਥੇ ਪਹੁੰਚ ਕੇ ਆਪਣੇ ਮਰਹੂਮ ਆਗੂ ਨੂੰ ਸ਼ਰਧਾਂਜਲੀ ਭੇਟ ਕਰ ਸਕਦੇ ਹਨ ਅਤੇ ਆਪਣੀ ਮਜ਼ਬੂਤ ਮੌਜੂਦਗੀ ਦਰਜ ਕਰਵਾ ਸਕਦੇ ਹਨ”
ਹਮਲੇ ਵਿੱਚ ਹੋਈ ਸੀ ਮੌਤ
ਜ਼ਿਕਰਯੋਗ ਹੈ ਕਿ 86 ਸਾਲਾ ਅਲੀ ਖ਼ਮੇਨੇਈ ਦੀ ਮੌਤ ਸ਼ਨੀਵਾਰ (27 ਫਰਵਰੀ, 2026) ਨੂੰ ਇਜ਼ਰਾਈਲ ਅਤੇ ਅਮਰੀਕਾ ਵੱਲੋਂ ਕੀਤੇ ਗਏ ਹਵਾਈ ਹਮਲਿਆਂ ਦੌਰਾਨ ਹੋਈ ਸੀ। ਖ਼ਮੇਨੇਈ ਨੇ ਆਪਣੇ ਸ਼ਾਸਨ ਦੌਰਾਨ ਹਮੇਸ਼ਾ ਅਮਰੀਕਾ ਅਤੇ ਇਜ਼ਰਾਈਲ ਪ੍ਰਤੀ ਸਖ਼ਤ ਰੁਖ਼ ਅਖਤਿਆਰ ਕੀਤਾ ਸੀ। ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਖੇਤਰ ਵਿੱਚ ਤਣਾਅ ਵਧ ਗਿਆ ਹੈ ਅਤੇ ਈਰਾਨ ਨੇ ਜਵਾਬੀ ਕਾਰਵਾਈ ਵਜੋਂ ਇਜ਼ਰਾਈਲ ਅਤੇ ਅਮਰੀਕੀ ਫੌਜੀ ਟਿਕਾਣਿਆਂ ‘ਤੇ ਹਮਲੇ ਤੇਜ਼ ਕਰ ਦਿੱਤੇ ਹਨ।
ਸਮਾਗਮ ਦਾ ਸਥਾਨ: ‘ਮੋਸੱਲਾ’
ਜਿਸ ‘ਮੋਸੱਲਾ’ ਕੰਪਾਊਂਡ ਵਿੱਚ ਖ਼ਮੇਨੇਈ ਦੀ ਦੇਹ ਨੂੰ ਅੰਤਿਮ ਦਰਸ਼ਨਾਂ ਲਈ ਰੱਖਿਆ ਗਿਆ ਹੈ, ਉਹ ਤੇਹਰਾਨ ਦੇ ਕੇਂਦਰ ਵਿੱਚ ਸਥਿਤ ਇੱਕ ਬਹੁਤ ਵੱਡਾ ਹਾਲ ਹੈ। ਇਹੀ ਉਹ ਸਥਾਨ ਹੈ ਜਿੱਥੇ ਖ਼ਮੇਨੇਈ ਅਕਸਰ ਜਨਤਕ ਭਾਸ਼ਣ ਦਿੰਦੇ ਸਨ ਅਤੇ ਨਮਾਜ਼ ਦੀ ਅਗਵਾਈ ਕਰਦੇ ਸਨ। ਪਾਰਟੀ ਅਤੇ ਪ੍ਰਸ਼ਾਸਨ ਵੱਲੋਂ ਅੰਤਿਮ ਸੰਸਕਾਰ ਦੀ ਯਾਤਰਾ ਦਾ ਐਲਾਨ ਆਉਣ ਵਾਲੇ ਦਿਨਾਂ ਵਿੱਚ ਕੀਤਾ ਜਾਵੇਗਾ
