ਕਾਂਗੜਾ: ਹਿਮਾਚਲ ਪ੍ਰਦੇਸ਼ ਦੇ ਮਸ਼ਹੂਰ ਸੈਰ-ਸਪਾਟਾ ਸਥਾਨ ਬੀੜ-ਬਿਲਿੰਗ ਵਿੱਚ ਪੈਰਾਗਲਾਈਡਿੰਗ ਦੌਰਾਨ ਇੱਕ ਦਰਦਨਾਕ ਹਾਦਸਾ ਵਾਪਰ ਗਿਆ। ਟੈਂਡਮ ਪੈਰਾਗਲਾਈਡਿੰਗ ਕਰ ਰਹੇ 26 ਸਾਲਾ ਨੌਜਵਾਨ ਦੀ ਉੱਚਾਈ ਤੋਂ ਹੇਠਾਂ ਡਿੱਗਣ ਕਾਰਨ ਮੌਤ ਹੋ ਗਈ। ਮ੍ਰਿਤਕ ਦੀ ਪਛਾਣ ਸ਼ੁਭਮ ਡੋਭਿਆਲ ਵਜੋਂ ਹੋਈ ਹੈ, ਜੋ ਗ੍ਰੇਟਰ ਨੋਇਡਾ ਦਾ ਰਹਿਣ ਵਾਲਾ ਸੀ ਅਤੇ ਇੱਕ ਸਰਕਾਰੀ ਪੈਟਰੋਲੀਅਮ ਕੰਪਨੀ ਵਿੱਚ ਕੰਮ ਕਰਦਾ ਸੀ।
ਜਾਣਕਾਰੀ ਅਨੁਸਾਰ ਸ਼ੁਭਮ ਆਪਣੀ ਭੈਣ ਅਤੇ ਤਿੰਨ ਕਜ਼ਨ ਨਾਲ ਛੁੱਟੀਆਂ ਮਨਾਉਣ ਲਈ ਹਿਮਾਚਲ ਪ੍ਰਦੇਸ਼ ਆਇਆ ਹੋਇਆ ਸੀ। ਮੰਗਲਵਾਰ ਸ਼ਾਮ ਨੂੰ ਉਹ ਪਾਇਲਟ ਵਿਨੈ ਕੁਮਾਰ ਨਾਲ ਪੈਰਾਗਲਾਈਡਿੰਗ ਲਈ ਉਡਾਣ ਭਰਨ ਗਿਆ। ਦੱਸਿਆ ਜਾ ਰਿਹਾ ਹੈ ਕਿ ਉਡਾਣ ਸ਼ੁਰੂ ਹੋਣ ਤੋਂ ਕਰੀਬ 6 ਮਿੰਟ ਬਾਅਦ ਉਹ ਪੈਰਾਗਲਾਈਡਰ ਤੋਂ ਹੇਠਾਂ ਡਿੱਗ ਗਿਆ ਅਤੇ ਨਿਰਧਾਰਤ ਲੈਂਡਿੰਗ ਸਥਾਨ ਦੇ ਨੇੜੇ ਸੰਘਣੇ ਜੰਗਲ ਵਿੱਚ ਜਾ ਡਿੱਗਿਆ।
ਪਾਇਲਟ ਨੇ ਸੁਰੱਖਿਅਤ ਕੀਤੀ ਲੈਂਡਿੰਗ, ਜੰਗਲ ’ਚੋਂ ਮਿਲੀ ਲਾਸ਼
ਰਿਪੋਰਟਾਂ ਮੁਤਾਬਕ ਪਾਇਲਟ ਵਿਨੈ ਕੁਮਾਰ ਨੇ ਸੁਰੱਖਿਅਤ ਲੈਂਡਿੰਗ ਕੀਤੀ ਅਤੇ ਹੋਰ ਪੈਰਾਗਲਾਈਡਿੰਗ ਪਾਇਲਟਾਂ ਨੂੰ ਯਾਤਰੀ ਦੇ ਹਵਾ ਵਿੱਚੋਂ ਡਿੱਗਣ ਬਾਰੇ ਸੂਚਿਤ ਕੀਤਾ। ਇਸ ਤੋਂ ਬਾਅਦ ਬਚਾਅ ਟੀਮਾਂ ਨੇ ਭਾਲ ਸ਼ੁਰੂ ਕੀਤੀ। ਰਾਤ ਸਮੇਂ ਸ਼ੁਭਮ ਦੀ ਲਾਸ਼ ਜੰਗਲ ਵਿੱਚੋਂ ਬਰਾਮਦ ਕੀਤੀ ਗਈ।
ਮ੍ਰਿਤਕ ਦੇ ਕਜ਼ਨ ਮਨੀਸ਼ ਨੇ ਦੱਸਿਆ ਕਿ ਪਰਿਵਾਰ ਦੇ ਹੋਰ ਮੈਂਬਰ ਵੀ ਪੈਰਾਗਲਾਈਡਿੰਗ ਕਰ ਰਹੇ ਸਨ। ਉਨ੍ਹਾਂ ਨੂੰ ਇਸ ਹਾਦਸੇ ਬਾਰੇ ਆਪਣੀਆਂ ਉਡਾਣਾਂ ਪੂਰੀਆਂ ਕਰਨ ਅਤੇ ਹੇਠਾਂ ਉਤਰਨ ਤੋਂ ਬਾਅਦ ਪਾਇਲਟ ਰਾਹੀਂ ਜਾਣਕਾਰੀ ਮਿਲੀ।
ਸੀਟ ਬੈਲਟ ਖੁੱਲ੍ਹਣ ਜਾਂ ਪਾਇਲਟ ਦੀਆਂ ਕਰਤਬਾਂ ਕਾਰਨ ਹੋਇਆ ਹਾਦਸਾ?
ਕਾਂਗੜਾ ਦੇ ਐੱਸਐੱਸਪੀ ਕੁਲਭੂਸ਼ਣ ਵਰਮਾ ਨੇ ਦੱਸਿਆ ਕਿ ਹਾਦਸੇ ਦੇ ਅਸਲ ਕਾਰਨਾਂ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ। ਮੁੱਢਲੀ ਜਾਂਚ ਵਿੱਚ ਦੋ ਸੰਭਾਵਨਾਵਾਂ ਸਾਹਮਣੇ ਆ ਰਹੀਆਂ ਹਨ। ਪਹਿਲੀ ਇਹ ਕਿ ਉਡਾਣ ਦੌਰਾਨ ਸੁਰੱਖਿਆ ਬੈਲਟ ਢਿੱਲੀ ਹੋ ਗਈ ਜਾਂ ਟੁੱਟ ਗਈ ਹੋਵੇ ਅਤੇ ਦੂਜੀ ਇਹ ਕਿ ਪਾਇਲਟ ਵੱਲੋਂ ਹਵਾ ਵਿੱਚ ਕੋਈ ਖ਼ਾਸ ਕਰਤਬ ਦਿਖਾਉਣ ਦੌਰਾਨ ਇਹ ਘਟਨਾ ਵਾਪਰੀ ਹੋਵੇ।
ਉਨ੍ਹਾਂ ਕਿਹਾ ਕਿ ਸੱਚਾਈ ਸਾਹਮਣੇ ਲਿਆਉਣ ਲਈ ਹਰ ਪਹਿਲੂ ਤੋਂ ਵਿਸਥਾਰਪੂਰਵਕ ਜਾਂਚ ਕੀਤੀ ਜਾ ਰਹੀ ਹੈ।
ਪਾਇਲਟ ਖ਼ਿਲਾਫ਼ FIR ਦਰਜ, ਡਰੱਗ ਟੈਸਟ ਵੀ ਕਰਵਾਇਆ
ਪੁਲਿਸ ਨੇ ਇਸ ਮਾਮਲੇ ਵਿੱਚ ਪਾਇਲਟ ਵਿਨੈ ਕੁਮਾਰ ਖ਼ਿਲਾਫ਼ ਲਾਪਰਵਾਹੀ ਕਾਰਨ ਮੌਤ ਹੋਣ ਦੇ ਦੋਸ਼ ਹੇਠ ਬੀੜ ਪੁਲਿਸ ਥਾਣੇ ਵਿੱਚ ਐੱਫਆਈਆਰ ਦਰਜ ਕੀਤੀ ਹੈ। ਇਸ ਤੋਂ ਇਲਾਵਾ ਪਾਇਲਟ ਦਾ ਡਰੱਗ ਟੈਸਟ ਵੀ ਕਰਵਾਏ ਜਾਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ। ਹਾਲਾਂਕਿ ਇਸ ਟੈਸਟ ਦੀ ਰਿਪੋਰਟ ਬਾਰੇ ਅਜੇ ਕੋਈ ਵੇਰਵਾ ਜਨਤਕ ਨਹੀਂ ਕੀਤਾ ਗਿਆ।
ਪ੍ਰਸ਼ਾਸਨ ਵੱਲੋਂ ਹਰ ਪਹਿਲੂ ਤੋਂ ਜਾਂਚ ਦੇ ਹੁਕਮ
ਕਾਂਗੜਾ ਦੇ ਡਿਪਟੀ ਕਮਿਸ਼ਨਰ ਹੇਮਰਾਜ ਬੈਰਵਾ ਨੇ ਕਿਹਾ ਕਿ ਪ੍ਰਸ਼ਾਸਨ ਵੱਲੋਂ ਹਾਦਸੇ ਦੇ ਸਾਰੇ ਸੰਭਾਵਿਤ ਕਾਰਨਾਂ ਦੀ ਜਾਂਚ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਇਕੱਲੇ ਪੈਰਾਗਲਾਈਡਿੰਗ ਕਰਨ ਵਾਲਾ ਵਿਅਕਤੀ ਆਪਣੀ ਸੁਰੱਖਿਆ ਲਈ ਖੁਦ ਜ਼ਿੰਮੇਵਾਰ ਹੁੰਦਾ ਹੈ, ਪਰ ਟੈਂਡਮ ਫਲਾਈਟ ਵਿੱਚ ਯਾਤਰੀ ਪੂਰੀ ਤਰ੍ਹਾਂ ਪਾਇਲਟ ’ਤੇ ਭਰੋਸਾ ਕਰਦਾ ਹੈ। ਇਸ ਲਈ ਮਾਮਲੇ ਨੂੰ ਗੰਭੀਰਤਾ ਨਾਲ ਲਿਆ ਜਾ ਰਿਹਾ ਹੈ।
ਇੱਕ ਪੈਰਾਗਲਾਈਡਿੰਗ ਇੰਸਟ੍ਰਕਟਰ ਨੇ ਇਸ ਘਟਨਾ ਨੂੰ ਸੰਭਾਵਿਤ ਤੌਰ ’ਤੇ ‘ਫ੍ਰੀ ਫਾਲ’ ਹਾਦਸਾ ਦੱਸਿਆ। ਉਸ ਮੁਤਾਬਕ ਹਾਰਨੈੱਸ ਸਹੀ ਢੰਗ ਨਾਲ ਨਾ ਬੰਨ੍ਹੀ ਹੋਣ ਜਾਂ ਸੁਰੱਖਿਆ ਬੈਲਟ ਨਾਲ ਛੇੜਛਾੜ ਹੋਣ ਕਾਰਨ ਅਜਿਹੇ ਹਾਦਸੇ ਵਾਪਰ ਸਕਦੇ ਹਨ। ਹਾਲਾਂਕਿ ਜਾਂਚ ਵਿੱਚ ਅਜੇ ਤੱਕ ਇਨ੍ਹਾਂ ਵਿੱਚੋਂ ਕਿਸੇ ਵੀ ਕਾਰਨ ਦੀ ਪੁਸ਼ਟੀ ਨਹੀਂ ਹੋਈ ਹੈ।
