ਨਵੀਂ ਦਿੱਲੀ : 12 ਜੂਨ 2025 ਨੂੰ ਅਹਿਮਦਾਬਾਦ ਵਿੱਚ ਹੋਏ ਭਿਆਨਕ ਏਅਰ ਇੰਡੀਆ ਜਹਾਜ਼ ਹਾਦਸੇ ਦੀ ਜਾਂਚ ਕਰ ਰਹੀਆਂ ਟੀਮਾਂ ਇੱਕ ਹੈਰਾਨ ਕਰਨ ਵਾਲੇ ਸਿੱਟੇ ‘ਤੇ ਪਹੁੰਚੀਆਂ ਹਨ। ਇਤਾਲਵੀ ਅਖ਼ਬਾਰ Corriere della Sera ਦੀ ਰਿਪੋਰਟ ਮੁਤਾਬਕ, ਇਹ ਹਾਦਸਾ ਕਿਸੇ ਤਕਨੀਕੀ ਨੁਕਸ ਕਾਰਨ ਨਹੀਂ, ਸਗੋਂ ਇੱਕ “ਜਾਣਬੁੱਝ ਕੇ ਕੀਤੀ ਗਈ ਕਾਰਵਾਈ” (Intentional Act) ਦਾ ਨਤੀਜਾ ਸੀ, ਪਾਇਲਟ ਨੇ ਜਾਣਬੁੱਝ ਕੇ ਕੀਤੀ ਸੀ ਤੇਲ ਦੀ ਸਪਲਾਈ ਬੰਦ
ਜਾਂਚ ਵਿੱਚ ਹੋਏ ਅਹਿਮ ਖੁਲਾਸੇ
ਭਾਰਤੀ ਅਤੇ ਅਮਰੀਕੀ ਮਾਹਿਰਾਂ ਦੀ ਸਾਂਝੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਜਹਾਜ਼ ਦੇ ਇੰਜਣ ਨੂੰ ਤੇਲ ਦੀ ਸਪਲਾਈ (Fuel Cut-off) ਮਕੈਨੀਕਲ ਫੇਲ੍ਹ ਹੋਣ ਕਾਰਨ ਨਹੀਂ ਰੁਕੀ ਸੀ, ਸਗੋਂ ਇਸ ਨੂੰ ਮੈਨੂਅਲ ਤਰੀਕੇ ਨਾਲ ਬੰਦ ਕੀਤਾ ਗਿਆ ਸੀ।
ਬਲੈਕ ਬਾਕਸ ਦਾ ਰਿਕਾਰਡ: ਜੁਲਾਈ 2025 ਦੀ ਮੁਢਲੀ ਰਿਪੋਰਟ ਵਿੱਚ ਕਾਕਪਿਟ ਦੀ ਆਖਰੀ ਗੱਲਬਾਤ ਸਾਹਮਣੇ ਆਈ ਸੀ। ਜਿਸ ਵਿੱਚ ਇੱਕ ਪਾਇਲਟ ਨੇ ਪੁੱਛਿਆ, “ਤੁਸੀਂ ਫਿਊਲ ਕਿਉਂ ਕੱਟ ਦਿੱਤਾ?” ਜਿਸ ਦੇ ਜਵਾਬ ਵਿੱਚ ਦੂਜੇ ਪਾਇਲਟ ਨੇ ਕਿਹਾ, “ਮੈਂ ਅਜਿਹਾ ਨਹੀਂ ਕੀਤਾ।”
ਦੋਵੇਂ ਇੰਜਣ ਸੀ ਬੰਦ: ਜਾਂਚਕਰਤਾਵਾਂ ਨੇ ਪਾਇਆ ਕਿ ਹਾਦਸੇ ਵੇਲੇ ਜਹਾਜ਼ ਦੇ ਦੋਵੇਂ ਇੰਜਣ ਬੰਦ ਕਰ ਦਿੱਤੇ ਗਏ ਸਨ, ਜਿਸ ਕਾਰਨ ਬੋਇੰਗ 787 ਡ੍ਰੀਮਲਾਈਨਰ ਨੇ ਆਪਣੀ ਸ਼ਕਤੀ ਗੁਆ ਦਿੱਤੀ ਅਤੇ ਸਿੱਧਾ ਜ਼ਮੀਨ ‘ਤੇ ਜਾ ਡਿੱਗਿਆ
ਪਾਇਲਟ ਦੀ ਮਾਨਸਿਕ ਸਿਹਤ ‘ਤੇ ਸਵਾਲ
ਰਿਪੋਰਟ ਮੁਤਾਬਕ, ਜਾਂਚ ਦਾ ਮੁੱਖ ਸ਼ੱਕ ਕੈਪਟਨ ਸੁਮੀਤ ਸੱਭਰਵਾਲ ‘ਤੇ ਹੈ।
ਡਿਪਰੈਸ਼ਨ ਦਾ ਦਾਅਵਾ: ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਹਾਦਸੇ ਤੋਂ ਕੁਝ ਸਮਾਂ ਪਹਿਲਾਂ ਕੈਪਟਨ ਸੱਭਰਵਾਲ ਮਾਨਸਿਕ ਤਣਾਅ (Depression) ਦਾ ਸ਼ਿਕਾਰ ਸਨ।
ਪਰਿਵਾਰ ਦਾ ਪੱਖ: ਦੂਜੇ ਪਾਸੇ ਕੈਪਟਨ ਦੇ ਪਿਤਾ ਨੇ ਇਨ੍ਹਾਂ ਇਲਜ਼ਾਮਾਂ ਨੂੰ ਸਿਰੇ ਤੋਂ ਖਾਰਜ ਕਰਦਿਆਂ ਕਿਹਾ ਹੈ ਕਿ ਉਨ੍ਹਾਂ ਦਾ ਬੇਟਾ ਬਿਲਕੁਲ ਤੰਦਰੁਸਤ ਸੀ ਅਤੇ ਨਿੱਜੀ ਜ਼ਿੰਦਗੀ ਜਾਂ ਤਲਾਕ ਦੀਆਂ ਗੱਲਾਂ ਸਿਰਫ਼ ਅਫ਼ਵਾਹਾਂ ਹਨ। ਉਨ੍ਹਾਂ ਨੇ ਇਸ ਮਾਮਲੇ ਦੀ ਮੁੜ ਜਾਂਚ ਦੀ ਮੰਗ ਕੀਤੀ ਹੈ
ਹਾਦਸੇ ਦੀ ਭਿਆਨਕਤਾ
ਇਹ ਹਾਦਸਾ ਪਿਛਲੇ ਸਾਲ ਅਹਿਮਦਾਬਾਦ ਹਵਾਈ ਅੱਡੇ ਤੋਂ ਉਡਾਣ ਭਰਨ ਦੇ ਕੁਝ ਸੈਕਿੰਡਾਂ ਬਾਅਦ ਹੀ ਵਾਪਰਿਆ ਸੀ। ਜਹਾਜ਼ ਮੈਡੀਕਲ ਵਿਦਿਆਰਥੀਆਂ ਦੇ ਇੱਕ ਹੋਸਟਲ ‘ਤੇ ਜਾ ਡਿੱਗਿਆ ਸੀ।
ਕੁੱਲ ਮੌਤਾਂ: ਇਸ ਹਾਦਸੇ ਵਿੱਚ 260 ਲੋਕਾਂ ਦੀ ਜਾਨ ਗਈ ਸੀ, ਜਿਨ੍ਹਾਂ ਵਿੱਚ ਜਹਾਜ਼ ਦੇ ਯਾਤਰੀ ਅਤੇ ਹੋਸਟਲ ਦੇ ਅੰਦਰ ਮੌਜੂਦ ਲੋਕ ਸ਼ਾਮਲ ਸਨ। ਪੂਰੇ ਜਹਾਜ਼ ਵਿੱਚੋਂ ਸਿਰਫ਼ ਇੱਕ ਯਾਤਰੀ ਹੀ ਜ਼ਿੰਦਾ ਬਚ ਸਕਿਆ ਸੀ।
ਜਾਂਚ ਦੀ ਅੰਤਿਮ ਰਿਪੋਰਟ ਵਿੱਚ ਹੁਣ ਪਾਇਲਟਾਂ ਦੀ ਨਿਰੰਤਰ ਮਾਨਸਿਕ ਸਿਹਤ ਜਾਂਚ (Psychological Evaluation) ਅਤੇ ਨਿਗਰਾਨੀ ਸਬੰਧੀ ਸਖ਼ਤ ਦਿਸ਼ਾ-ਨਿਰਦੇਸ਼ ਸ਼ਾਮਲ ਕੀਤੇ ਜਾਣ ਦੀ ਉਮੀਦ ਹੈ। ਅਮਰੀਕੀ ਮਾਹਿਰਾਂ ਨੇ ਇਸ ਜਾਂਚ ਦੇ ਨਤੀਜਿਆਂ ਨੂੰ ਇੱਕ “ਵੱਡੀ ਸਫਲਤਾ” ਦੱਸਿਆ ਹੈ
