ਜਾਪਾਨ ਵਾਂਗ ਭਾਰਤ ਚ' ਵੀ ਬਣੀ ਪਹਿਲੀ 'ਮਿਊਜ਼ੀਕਲ ਰੋਡ', ਜਾਣੋ ਕੀ ਹੈ ਖ਼ਾਸੀਅਤ

ਮੁੰਬਈ: ਮੁੰਬਈ ਦੇ ਨਾਮ ਇੱਕ ਹੋਰ ਵੱਡੀ ਉਪਲਬਧੀ ਜੁੜ ਗਈ ਹੈ। ਮੁੰਬਈ ਕੋਸਟਲ ਰੋਡ ਪ੍ਰੋਜੈਕਟ (MCRP) ਦਾ ਇੱਕ ਹਿੱਸਾ ਹੁਣ ਭਾਰਤ ਦੀ ਪਹਿਲੀ ‘ਮਿਊਜ਼ੀਕਲ ਰੋਡ’ (Musical Road) ਬਣ ਗਿਆ ਹੈ। ਹੁਣ ਜਦੋਂ ਵਾਹਨ ਚਾਲਕ ਇਸ ਸੜਕ ਤੋਂ ਗੁਜ਼ਰਨਗੇ, ਤਾਂ ਉਨ੍ਹਾਂ ਨੂੰ ਗੱਡੀ ਦੇ ਅੰਦਰ ਹੀ ‘ਜੈ ਹੋ’ ਗੀਤ ਦੀ ਧੁਨ ਸੁਣਾਈ ਦੇਵੇਗੀ

ਕਿਵੇਂ ਸੁਣਾਈ ਦੇਵੇਗਾ ਸੰਗੀਤ?
ਇਹ ਕੋਈ ਜਾਦੂ ਨਹੀਂ, ਸਗੋਂ ਇੰਜੀਨੀਅਰਿੰਗ ਦਾ ਇੱਕ ਕਮਾਲ ਹੈ। ਨਰੀਮਨ ਪੁਆਇੰਟ ਤੋਂ ਵਰਲੀ ਵੱਲ ਜਾਣ ਵਾਲੀ ਸੜਕ ‘ਤੇ ਵਿਸ਼ੇਸ਼ ‘ਮਿਊਜ਼ੀਕਲ ਸਟ੍ਰਿਪਸ’ ਲਗਾਈਆਂ ਗਈਆਂ ਹਨ। ਜਿਵੇਂ ਹੀ ਵਾਹਨ 80 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਇਨ੍ਹਾਂ ਸਟ੍ਰਿਪਸ ਦੇ ਉੱਪਰੋਂ ਲੰਘਦੇ ਹਨ, ਟਾਇਰਾਂ ਅਤੇ ਸੜਕ ਦੇ ਰਗੜ ਕਾਰਨ ਸਲੱਮਡੌਗ ਮਿਲੀਅਨੇਅਰ ਫਿਲਮ ਦੇ ਮਸ਼ਹੂਰ ਗੀਤ ‘ਜੈ ਹੋ’ ਦੀ ਧੁਨ ਪੈਦਾ ਹੁੰਦੀ ਹੈ।

‘ਜੈ ਹੋ’ ਧੁਨ ਹੀ ਕਿਉਂ ਚੁਣੀ ਗਈ?
ਨਗਰ ਨਿਗਮ ਦੇ ਇੱਕ ਅਧਿਕਾਰੀ ਅਨੁਸਾਰ, ‘ਜੈ ਹੋ’ ਦੀ ਧੁਨ ਰਾਸ਼ਟਰ ਨੂੰ ਸਮਰਪਿਤ ਹੈ। ਇਹ ਗੀਤ ਲੋਕਾਂ ਵਿੱਚ ਦੇਸ਼ ਭਗਤੀ ਦੀ ਭਾਵਨਾ ਜਗਾਉਂਦਾ ਹੈ ਅਤੇ ਭਾਰਤ ਦੀ ਵਿਸ਼ਵ ਪੱਧਰੀ ਜਿੱਤ ਦਾ ਪ੍ਰਤੀਕ ਹੈ। ਇਸ ਤਕਨੀਕ ਦਾ ਮੁੱਖ ਮਕਸਦ ਡਰਾਈਵਿੰਗ ਦੇ ਤਜ਼ਰਬੇ ਨੂੰ ਮਨੋਰੰਜਕ ਬਣਾਉਣਾ ਅਤੇ ਤਕਨਾਲੋਜੀ ਦਾ ਪ੍ਰਦਰਸ਼ਨ ਕਰਨਾ ਹੈ

ਦੁਨੀਆ ਦੀ ਪੰਜਵੀਂ ਅਜਿਹੀ ਸੜਕ
ਇਹ ਪ੍ਰੋਜੈਕਟ ਨਾ ਸਿਰਫ਼ ਭਾਰਤ ਲਈ ਪਹਿਲਾ ਹੈ, ਸਗੋਂ ਵਿਸ਼ਵ ਪੱਧਰ ‘ਤੇ ਵੀ ਬਹੁਤ ਖ਼ਾਸ ਹੈ। ਮੁੰਬਈ ਦੀ ਇਹ ਸੜਕ ਦੁਨੀਆ ਦੀ ਅਜਿਹੀ ਸਿਰਫ਼ ਪੰਜਵੀਂ ਸੜਕ ਬਣ ਗਈ ਹੈ ਜਿੱਥੇ ਇਸ ਤਰ੍ਹਾਂ ਦੀ ਮਿਊਜ਼ੀਕਲ ਤਕਨੀਕ ਦਾ ਇਸਤੇਮਾਲ ਕੀਤਾ ਗਿਆ ਹੈ।

ਮੁੰਬਈ ਕੋਸਟਲ ਰੋਡ ਪ੍ਰੋਜੈਕਟ ਬਾਰੇ ਅਹਿਮ ਜਾਣਕਾਰੀ

ਨਾਮ: ਧਰਮਵੀਰ ਸਵਰਾਜ ਰੱਖਿਅਕ ਛਤਰਪਤੀ ਸੰਭਾਜੀ ਮਹਾਰਾਜ ਕੋਸਟਲ ਰੋਡ। ਲਗਭਗ 29.2 ਕਿਲੋਮੀਟਰ (ਮਰੀਨ ਲਾਈਨਜ਼ ਤੋਂ ਦਹੀਸਰ ਤੱਕ)। ਲਾਗਤ ਕਰੀਬ 14,000 ਕਰੋੜ ਰੁਪਏ। ਇਹ ਰੋਡ ਦੱਖਣੀ ਮੁੰਬਈ ਅਤੇ ਉਪਨਗਰਾਂ (Suburbs) ਵਿਚਕਾਰ ਸਫ਼ਰ ਦੇ ਸਮੇਂ ਨੂੰ ਕਾਫ਼ੀ ਹੱਦ ਤੱਕ ਘਟਾ ਦੇਵੇਗੀ ਅਤੇ ਟ੍ਰੈਫਿਕ ਜਾਮ ਤੋਂ ਮੁਕਤੀ ਦਿਵਾਏਗੀ

ਹੁਣ ਮੁੰਬਈ ਵਾਸੀਆਂ ਅਤੇ ਸੈਲਾਨੀਆਂ ਲਈ ਇਸ ਕੋਸਟਲ ਰੋਡ ‘ਤੇ ਸਫ਼ਰ ਕਰਨਾ ਸਿਰਫ਼ ਇੱਕ ਯਾਤਰਾ ਨਹੀਂ, ਸਗੋਂ ਇੱਕ ਯਾਦਗਾਰ ਅਨੁਭਵ ਹੋਵੇਗਾ