ਜੰਮੂ: ਜੰਮੂ-ਕਸ਼ਮੀਰ ਵਿੱਚ ਕੰਟਰੋਲ ਰੇਖਾ (LoC) ਦੇ ਨਾਲ ਲੱਗਦੇ ਇਲਾਕਿਆਂ ਵਿੱਚ ਐਤਵਾਰ ਸ਼ਾਮ ਨੂੰ ਸ਼ੱਕੀ ਡਰੋਨਾਂ ਦੀ ਵੱਡੀ ਹਲਚਲ ਦੇਖੀ ਗਈ। ਸਾਂਬਾ, ਰਾਜੌਰੀ ਅਤੇ ਪੁੰਛ ਜ਼ਿਲ੍ਹਿਆਂ ਦੇ ਵੱਖ-ਵੱਖ ਖੇਤਰਾਂ ਵਿੱਚ ਸਰਹੱਦ ਪਾਰੋਂ ਆਏ ਇਨ੍ਹਾਂ ਉੱਡਦੇ ਹੋਏ ਸ਼ੱਕੀ ਡਰੋਨਾਂ ਨੇ ਸੁਰੱਖਿਆ ਬਲਾਂ ਨੂੰ ਚੌਕਸ ਕਰ ਦਿੱਤਾ। ਭਾਰਤੀ ਫੌਜ ਵੱਲੋਂ ਕੀਤੀ ਗਈ ਜਵਾਬੀ ਕਾਰਵਾਈ ਤੋਂ ਬਾਅਦ ਇਹ ਡਰੋਨ ਵਾਪਸ ਪਾਕਿਸਤਾਨ ਵੱਲ ਮੁੜ ਗਏ
ਰਾਜੌਰੀ ਦੇ ਨੌਸ਼ਹਿਰਾ ਵਿੱਚ ਫੌਜ ਦੀ ਕਾਰਵਾਈ
ਅਧਿਕਾਰਤ ਸੂਤਰਾਂ ਅਨੁਸਾਰ, ਰਾਜੌਰੀ ਜ਼ਿਲ੍ਹੇ ਦੇ ਨੌਸ਼ਹਿਰਾ ਸੈਕਟਰ ਵਿੱਚ ਕੰਟਰੋਲ ਰੇਖਾ ਦੀ ਰਾਖੀ ਕਰ ਰਹੇ ਭਾਰਤੀ ਜਵਾਨਾਂ ਨੇ ਸ਼ਾਮ ਲਗਭਗ 6:35 ਵਜੇ ਗਣਿਆ-ਕਾਲਸੀਆਂ ਪਿੰਡ ਦੇ ਉੱਪਰ ਇੱਕ ਡਰੋਨ ਨੂੰ ਉੱਡਦੇ ਦੇਖਿਆ। ਭਾਰਤੀ ਫੌਜ ਨੇ ਤੁਰੰਤ ਹਰਕਤ ਵਿੱਚ ਆਉਂਦੇ ਹੋਏ ਮੀਡੀਅਮ ਅਤੇ ਲਾਈਟ ਮਸ਼ੀਨ ਗਨਾਂ (LMG/MMG) ਨਾਲ ਫਾਇਰਿੰਗ ਸ਼ੁਰੂ ਕਰ ਦਿੱਤੀ, ਜਿਸ ਤੋਂ ਬਾਅਦ ਡਰੋਨ ਵਾਪਸ ਪਰਤ ਗਿਆ
ਇਸੇ ਦੌਰਾਨ ਰਾਜੌਰੀ ਦੇ ਹੀ ਟੇਰਯਾਥ ਇਲਾਕੇ ਦੇ ਖੱਬਰ ਪਿੰਡ ਵਿੱਚ ਇੱਕ ਹੋਰ ਡਰੋਨ ਦੇਖਿਆ ਗਿਆ। ਇਸ ਡਰੋਨ ‘ਤੇ ਲਾਈਟਾਂ ਜਗ ਰਹੀਆਂ ਸਨ ਅਤੇ ਇਹ ਕਾਲਾਕੋਟ ਦੇ ਧਰਮਸਾਲ ਪਿੰਡ ਵੱਲੋਂ ਆ ਕੇ ਭਾਰਖ ਵੱਲ ਵਧ ਰਿਹਾ ਸੀ
ਪੁੰਛ ਅਤੇ ਸਾਂਬਾ ਵਿੱਚ ਵੀ ਦਿਖੀ ਹਲਚਲ
ਸਿਰਫ਼ ਰਾਜੌਰੀ ਹੀ ਨਹੀਂ, ਬਲਕਿ ਪੁੰਛ ਜ਼ਿਲ੍ਹੇ ਦੇ ਮਾਨਕੋਟ ਸੈਕਟਰ ਵਿੱਚ ਵੀ ਸ਼ਾਮ 6:25 ਵਜੇ ਇੱਕ ਸ਼ੱਕੀ ਵਸਤੂ ਤੈਨ (Tain) ਤੋਂ ਟੋਪਾ ਵੱਲ ਵਧਦੀ ਦੇਖੀ ਗਈ। ਇਸ ਤੋਂ ਇਲਾਵਾ ਸਾਂਬਾ ਜ਼ਿਲ੍ਹੇ ਦੇ ਚੱਕ ਬਾਬਰਾਲ ਇਲਾਕੇ ਵਿੱਚ ਸ਼ਾਮ 7:15 ਵਜੇ ਇੱਕ ਹੋਰ ਚਮਕਦੀ ਰੋਸ਼ਨੀ ਵਾਲੀ ਵਸਤੂ ਕਈ ਮਿੰਟਾਂ ਤੱਕ ਹਵਾ ਵਿੱਚ ਮੰਡਰਾਉਂਦੀ ਰਹੀ।
ਸਰਚ ਆਪ੍ਰੇਸ਼ਨ ਜਾਰੀ
ਸੁਰੱਖਿਆ ਅਧਿਕਾਰੀਆਂ ਨੇ ਦੱਸਿਆ ਕਿ ਡਰੋਨਾਂ ਰਾਹੀਂ ਹਥਿਆਰਾਂ ਜਾਂ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ, ਉਨ੍ਹਾਂ ਇਲਾਕਿਆਂ ਵਿੱਚ ਵੱਡੇ ਪੱਧਰ ‘ਤੇ ਤਲਾਸ਼ੀ ਮੁਹਿੰਮ (Search Operation) ਸ਼ੁਰੂ ਕਰ ਦਿੱਤੀ ਗਈ ਹੈ ਜਿੱਥੇ ਇਹ ਡਰੋਨ ਦੇਖੇ ਗਏ ਸਨ। ਭਾਰਤੀ ਹਥਿਆਰਬੰਦ ਬਲਾਂ ਨੇ ਐਂਟੀ-ਡਰੋਨ ਤਕਨੀਕ ਅਤੇ ਜਵਾਬੀ ਕਾਰਵਾਈ ਦੀ ਵਰਤੋਂ ਕਰਦਿਆਂ ਇਨ੍ਹਾਂ ਘੁਸਪੈਠ ਦੀਆਂ ਕੋਸ਼ਿਸ਼ਾਂ ਨੂੰ ਨਾਕਾਮ ਕਰ ਦਿੱਤਾ ਹੈ
ਦੱਸਣਯੋਗ ਹੈ ਕਿ ਸਰਹੱਦ ਪਾਰ ਤੋਂ ਹੋ ਰਹੀਆਂ ਇਨ੍ਹਾਂ ਗਤੀਵਿਧੀਆਂ ਨੂੰ ਭਾਰਤ ਦੀ ਸੁਰੱਖਿਆ ਵਿੱਚ ਸੰਨ੍ਹ ਲਾਉਣ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ, ਜਿਸ ਕਾਰਨ ਪੂਰੇ ਸਰਹੱਦੀ ਇਲਾਕੇ ਵਿੱਚ ਹਾਈ ਅਲਰਟ ਜਾਰੀ ਹੈ
