ਦੁਨੀਆ ਭਰ ਵਿੱਚ Facebook ਅਤੇ Instagram ਸੇਵਾਵਾਂ ਪ੍ਰਭਾਵਿਤ

ਦੁਨੀਆ ਦੀਆਂ ਸਭ ਤੋਂ ਲੋਕਪ੍ਰਿਯ ਸੋਸ਼ਲ ਮੀਡੀਆ ਸੇਵਾਵਾਂ Facebook ਅਤੇ Instagram ਨੂੰ ਅੱਜ ਅਚਾਨਕ ਤਕਨੀਕੀ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪਿਆ। ਕਈ ਦੇਸ਼ਾਂ ਦੇ ਯੂਜ਼ਰਾਂ ਨੇ ਸ਼ਿਕਾਇਤ ਕੀਤੀ ਕਿ ਉਨ੍ਹਾਂ ਦੇ ਅਕਾਊਂਟ ਆਪਣੇ ਆਪ ਲਾਗਆਊਟ ਹੋ ਗਏ ਅਤੇ ਉਹ ਮੁੜ ਲਾਗਇਨ ਨਹੀਂ ਕਰ ਸਕੇ

ਯੂਜ਼ਰਾਂ ਮੁਤਾਬਕ Facebook ਅਤੇ Instagram ਦੇ ਵੈੱਬ ਵਰਜਨ ਅਤੇ ਮੋਬਾਈਲ ਐਪਸ ਦੋਵਾਂ ‘ਚ ਸਮੱਸਿਆਵਾਂ ਦੇਖਣ ਨੂੰ ਮਿਲੀਆਂ। ਕੁਝ ਲੋਕਾਂ ਨੂੰ ਸ਼ੁਰੂਆਤੀ ਫੀਡ ਤਾਂ ਦਿਖਾਈ ਦਿੱਤੀ, ਪਰ ਪ੍ਰੋਫਾਈਲ ਖੋਲ੍ਹਣ, ਦੋਸਤਾਂ ਨੂੰ ਖੋਜਣ ਜਾਂ ਹੋਰ ਫੀਚਰ ਵਰਤਣ ਦੌਰਾਨ ਐਰਰ ਮੈਸੇਜ ਆਉਣ ਲੱਗੇ

ਇਸ ਦੇ ਨਾਲ ਹੀ Meta Business Suite ਦੀਆਂ ਸੇਵਾਵਾਂ ਵੀ ਪ੍ਰਭਾਵਿਤ ਹੋਣ ਦੀਆਂ ਰਿਪੋਰਟਾਂ ਸਾਹਮਣੇ ਆਈਆਂ ਹਨ, ਜਿਸ ਕਾਰਨ ਕਾਰੋਬਾਰੀ ਯੂਜ਼ਰਾਂ ਅਤੇ ਡਿਜੀਟਲ ਮਾਰਕੀਟਿੰਗ ਨਾਲ ਜੁੜੇ ਲੋਕਾਂ ਨੂੰ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ।

ਸੋਸ਼ਲ ਮੀਡੀਆ ਅਤੇ ਆਨਲਾਈਨ ਕਮਿਊਨਿਟੀਆਂ ਵਿੱਚ ਹਜ਼ਾਰਾਂ ਯੂਜ਼ਰਾਂ ਨੇ ਆਪਣੇ ਤਜਰਬੇ ਸਾਂਝੇ ਕੀਤੇ ਹਨ। ਕਈ ਲੋਕਾਂ ਨੇ ਦੱਸਿਆ ਕਿ Facebook, Messenger ਅਤੇ Instagram ਤੋਂ ਉਹ ਅਚਾਨਕ ਸਾਈਨ ਆਊਟ ਹੋ ਗਏ, ਜਦਕਿ ਕੁਝ ਯੂਜ਼ਰ ਪਲੇਟਫਾਰਮਾਂ ਤੱਕ ਪਹੁੰਚ ਹੀ ਨਹੀਂ ਕਰ ਸਕੇ

ਖ਼ਬਰ ਲਿਖੇ ਜਾਣ ਤੱਕ Meta ਵੱਲੋਂ ਇਸ ਸਮੱਸਿਆ ਦੇ ਕਾਰਨਾਂ ਬਾਰੇ ਕੋਈ ਅਧਿਕਾਰਕ ਜਾਣਕਾਰੀ ਜਾਰੀ ਨਹੀਂ ਕੀਤੀ ਗਈ ਸੀ। ਕੰਪਨੀ ਨੇ ਇਹ ਵੀ ਨਹੀਂ ਦੱਸਿਆ ਕਿ ਸੇਵਾਵਾਂ ਪੂਰੀ ਤਰ੍ਹਾਂ ਕਦੋਂ ਤੱਕ ਬਹਾਲ ਹੋਣਗੀਆਂ।

ਇਸ ਦੌਰਾਨ ਸੋਸ਼ਲ ਮੀਡੀਆ ‘ਤੇ ਕਈ ਤਰ੍ਹਾਂ ਦੀਆਂ ਅਟਕਲਾਂ ਵੀ ਲਗਾਈਆਂ ਜਾ ਰਹੀਆਂ ਹਨ। ਕੁਝ ਲੋਕ ਇਸਨੂੰ ਹਾਲੀਆ ਪਲੇਟਫਾਰਮ ਅਪਡੇਟਾਂ ਨਾਲ ਜੋੜ ਰਹੇ ਹਨ, ਜਦਕਿ ਹੋਰਾਂ ਦਾ ਮੰਨਣਾ ਹੈ ਕਿ ਸਰਵਰ ਜਾਂ ਬੈਕਐਂਡ ਇਨਫਰਾਸਟਰੱਕਚਰ ਵਿੱਚ ਤਕਨੀਕੀ ਖ਼ਰਾਬੀ ਇਸ ਦਾ ਕਾਰਨ ਹੋ ਸਕਦੀ ਹੈ। ਹਾਲਾਂਕਿ, ਅਜੇ ਤੱਕ ਕਿਸੇ ਵੀ ਕਾਰਨ ਦੀ ਅਧਿਕਾਰਕ ਪੁਸ਼ਟੀ ਨਹੀਂ ਹੋਈ ਹੈ

ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ ਵੀ Meta ਦੇ ਪਲੇਟਫਾਰਮਾਂ ‘ਤੇ ਇਸ ਤਰ੍ਹਾਂ ਦੀਆਂ ਰੁਕਾਵਟਾਂ ਆ ਚੁੱਕੀਆਂ ਹਨ। ਪਿਛਲੇ ਮਾਮਲਿਆਂ ਵਿੱਚ ਕੰਪਨੀ ਨੇ ਅੰਦਰੂਨੀ ਤਕਨੀਕੀ ਸਮੱਸਿਆਵਾਂ ਨੂੰ ਕਾਰਨ ਦੱਸਦਿਆਂ ਸੇਵਾਵਾਂ ਨੂੰ ਬਹਾਲ ਕੀਤਾ ਸੀ। ਮੌਜੂਦਾ ਸਮੱਸਿਆ ਦੇ ਕਾਰਨਾਂ ਬਾਰੇ ਵੀ ਯੂਜ਼ਰ Meta ਦੇ ਅਧਿਕਾਰਕ ਬਿਆਨ ਦੀ ਉਡੀਕ ਕਰ ਰਹੇ ਹਨ