USA : ਅਰਜਨਟੀਨਾ ਦੇ ਮਹਾਨ ਫੁੱਟਬਾਲਰ Lionel Messi ਲਈ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਮੈਸੀ ਦੇ ਪਿਤਾ ਅਤੇ ਲੰਬੇ ਸਮੇਂ ਤੱਕ ਉਨ੍ਹਾਂ ਦੇ ਕਰੀਅਰ ਦੇ ਮਾਰਗਦਰਸ਼ਕ ਰਹੇ Jorge Messi ਦਾ 68 ਸਾਲ ਦੀ ਉਮਰ ਵਿੱਚ ਦਿਹਾਂਤ ਹੋ ਗਿਆ ਹੈ। ਰਿਪੋਰਟਾਂ ਮੁਤਾਬਕ ਜੋਰਜੇ ਮੈਸੀ ਨੇ ਅਰਜਨਟੀਨਾ ਦੇ ਰੋਸਾਰਿਓ ਸ਼ਹਿਰ ਵਿੱਚ ਆਖਰੀ ਸਾਹ ਲਏ। ਪਰਿਵਾਰ ਵੱਲੋਂ ਇਸ ਦੁਖਦਾਈ ਖ਼ਬਰ ਦੀ ਪੁਸ਼ਟੀ ਕੀਤੀ ਗਈ ਹੈ
ਜੋਰਜੇ ਮੈਸੀ ਪਿਛਲੇ ਕੁਝ ਸਮੇਂ ਤੋਂ ਬਿਮਾਰ ਚੱਲ ਰਹੇ ਸਨ। ਸਿਹਤ ਖਰਾਬ ਹੋਣ ਕਾਰਨ ਉਹ ਕਈ ਮਹੀਨਿਆਂ ਤੋਂ ਇਲਾਜ ਅਧੀਨ ਸਨ ਅਤੇ ਉਨ੍ਹਾਂ ਦਾ ਸਮਾਂ ਹਸਪਤਾਲ ਤੇ ਘਰ ਵਿਚਕਾਰ ਬੀਤ ਰਿਹਾ ਸੀ। ਆਖਰੀ ਸਮੇਂ ਦੌਰਾਨ ਉਹ ਆਪਣੀ ਪਤਨੀ ਸੇਲੀਆ ਅਤੇ ਬੱਚਿਆਂ ਰੋਡਰੀਗੋ, ਮਤਿਆਸ ਅਤੇ ਮਾਰੀਆ ਸੋਲ ਨਾਲ ਘਿਰੇ ਹੋਏ ਸਨ
ਮੈਸੀ ਦੇ ਕਰੀਅਰ ਵਿੱਚ ਪਿਤਾ ਦੀ ਰਹੀ ਵੱਡੀ ਭੂਮਿਕਾ
ਜੋਰਜੇ ਮੈਸੀ ਨੇ ਆਪਣੇ ਪੁੱਤਰ ਲਿਓਨਲ ਮੈਸੀ ਦੇ ਫੁੱਟਬਾਲ ਕਰੀਅਰ ਵਿੱਚ ਬਹੁਤ ਅਹਿਮ ਭੂਮਿਕਾ ਨਿਭਾਈ। ਉਹ ਨਾ ਸਿਰਫ਼ ਪਿਤਾ ਸਨ, ਸਗੋਂ ਕਈ ਸਾਲਾਂ ਤੱਕ ਮੈਸੀ ਦੇ ਪ੍ਰਤੀਨਿਧੀ ਵਜੋਂ ਵੀ ਕੰਮ ਕਰਦੇ ਰਹੇ। ਮੈਸੀ ਦੇ ਸ਼ੁਰੂਆਤੀ ਦੌਰ ਤੋਂ ਲੈ ਕੇ ਵਿਸ਼ਵ ਪੱਧਰੀ ਸਿਤਾਰਾ ਬਣਨ ਤੱਕ ਜੋਰਜੇ ਉਨ੍ਹਾਂ ਦੇ ਸਭ ਤੋਂ ਵੱਡੇ ਸਹਿਯੋਗੀਆਂ ਵਿੱਚੋਂ ਇੱਕ ਰਹੇ
ਮੈਸੀ ਨੇ ਕਈ ਮੌਕਿਆਂ ‘ਤੇ ਦੱਸਿਆ ਸੀ ਕਿ ਉਹ ਹਰ ਮੈਚ ਤੋਂ ਬਾਅਦ ਆਪਣੇ ਪਿਤਾ ਦੀ ਰਾਏ ਜ਼ਰੂਰ ਲੈਂਦੇ ਸਨ। ਇੱਕ ਇੰਟਰਵਿਊ ਵਿੱਚ ਉਨ੍ਹਾਂ ਕਿਹਾ ਸੀ ਕਿ ਬਚਪਨ ਤੋਂ ਹੀ ਉਨ੍ਹਾਂ ਨੂੰ ਆਪਣੇ ਪਿਤਾ ਦੀ ਮਨਜ਼ੂਰੀ ਦੀ ਲੋੜ ਮਹਿਸੂਸ ਹੁੰਦੀ ਸੀ ਅਤੇ ਉਹ ਹਰ ਪ੍ਰਦਰਸ਼ਨ ਤੋਂ ਬਾਅਦ ਪੁੱਛਦੇ ਸਨ ਕਿ ਉਨ੍ਹਾਂ ਦਾ ਖੇਡ ਕਿਵੇਂ ਰਿਹਾ
ਪਰਿਵਾਰ ਨਾਲ ਬਿਤਾਇਆ ਸੀ ਖਾਸ ਸਮਾਂ
ਵਿਸ਼ਵ ਕੱਪ ਤੋਂ ਬਾਅਦ ਮੈਸੀ ਨੇ ਅਰਜਨਟੀਨਾ ਵਿੱਚ ਆਪਣੇ ਪਰਿਵਾਰ ਨਾਲ ਸਮਾਂ ਬਿਤਾਇਆ ਸੀ। ਉਸ ਸਮੇਂ ਉਨ੍ਹਾਂ ਨੇ ਫੁੱਟਬਾਲ ਤੋਂ ਕੁਝ ਦਿਨਾਂ ਦੀ ਛੁੱਟੀ ਲੈ ਕੇ ਆਪਣੇ ਪਿਤਾ ਨਾਲ ਕੀਮਤੀ ਪਲ ਸਾਂਝੇ ਕੀਤੇ। ਬਾਅਦ ਵਿੱਚ ਉਹ ਅਮਰੀਕਾ ਵਾਪਸ ਆ ਕੇ Inter Miami CF ਨਾਲ ਜੁੜ ਗਏ ਸਨ।
ਮੈਸੀ ਨੇ ਹਾਲ ਹੀ ਵਿੱਚ ਮੈਦਾਨ ‘ਤੇ ਵਾਪਸੀ ਕਰਦੇ ਹੋਏ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਇੱਕ ਮੈਚ ਵਿੱਚ ਦੋ ਗੋਲ ਵੀ ਕੀਤੇ, ਪਰ ਇਸ ਦੌਰਾਨ ਉਹ ਨਿੱਜੀ ਤੌਰ ‘ਤੇ ਵੱਡੀ ਚੁਣੌਤੀ ਦਾ ਸਾਹਮਣਾ ਕਰ ਰਹੇ ਸਨ।
2026 ਵਿਸ਼ਵ ਕੱਪ ਦੌਰਾਨ ਵੀ ਚਿੰਤਾ ਵਿੱਚ ਸੀ ਪਰਿਵਾਰ
ਰਿਪੋਰਟਾਂ ਅਨੁਸਾਰ ਜੋਰਜੇ ਮੈਸੀ ਦੀ ਸਿਹਤ 2026 ਵਿਸ਼ਵ ਕੱਪ ਦੌਰਾਨ ਵੀ ਠੀਕ ਨਹੀਂ ਸੀ, ਜਿਸ ਕਾਰਨ ਉਹ ਅਮਰੀਕਾ ਵਿੱਚ ਹੋ ਰਹੇ ਟੂਰਨਾਮੈਂਟ ਵਿੱਚ ਆਪਣੇ ਪੁੱਤਰ ਨੂੰ ਖੇਡਦਾ ਦੇਖਣ ਨਹੀਂ ਪਹੁੰਚ ਸਕੇ। ਇਸ ਤੋਂ ਪਹਿਲਾਂ 2022 ਵਿਸ਼ਵ ਕੱਪ ਦੌਰਾਨ ਉਹ ਮੈਸੀ ਦਾ ਹੌਸਲਾ ਵਧਾਉਣ ਲਈ ਮੌਜੂਦ ਸਨ।
ਵਿਸ਼ਵ ਕੱਪ ਦੌਰਾਨ ਮੈਸੀ ਖੁਦ ਵੀ ਭਾਵੁਕ ਦੌਰ ਵਿੱਚੋਂ ਲੰਘੇ। ਅਲਜੀਰੀਆ ਖ਼ਿਲਾਫ਼ ਆਪਣੀ ਪਹਿਲੀ ਵਿਸ਼ਵ ਕੱਪ ਹੈਟ੍ਰਿਕ ਤੋਂ ਬਾਅਦ ਗੋਲ ਦਾ ਜਸ਼ਨ ਮਨਾਉਂਦੇ ਹੋਏ ਉਹ ਭਾਵੁਕ ਹੋ ਗਏ ਸਨ। ਉਨ੍ਹਾਂ ਬਾਅਦ ਵਿੱਚ ਕਿਹਾ ਸੀ ਕਿ ਇਹ ਭਾਵਨਾਵਾਂ ਫੁੱਟਬਾਲ ਨਾਲ ਨਹੀਂ ਸਗੋਂ ਨਿੱਜੀ ਮੁਸ਼ਕਲਾਂ ਨਾਲ ਜੁੜੀਆਂ ਹੋਈਆਂ ਸਨ।
ਜੋਰਜੇ ਮੈਸੀ ਦਾ ਦਿਹਾਂਤ ਲਿਓਨਲ ਮੈਸੀ ਅਤੇ ਉਨ੍ਹਾਂ ਦੇ ਪਰਿਵਾਰ ਲਈ ਇੱਕ ਵੱਡਾ ਨਿੱਜੀ ਨੁਕਸਾਨ ਹੈ। ਫੁੱਟਬਾਲ ਜਗਤ ਵੱਲੋਂ ਵੀ ਮੈਸੀ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ ਜਾ ਰਿਹਾ ਹੈ
