ਅਮਰੀਕਾ ਦੇ ਸਿਏਟਲ ਸ਼ਹਿਰ ਨੇ ਭਾਰਤੀ ਮੂਲ ਦੀ 23 ਸਾਲਾ ਵਿਦਿਆਰਥਣ ਜਾਹਨਵੀ ਕੰਡੂਲਾ ਦੀ ਮੌਤ ਦੇ ਮਾਮਲੇ ਵਿੱਚ ਉਸ ਦੇ ਪਰਿਵਾਰ ਨਾਲ ਇੱਕ ਇਤਿਹਾਸਕ ਸਮਝੌਤਾ ਕੀਤਾ ਹੈ। ਸਿਏਟਲ ਪ੍ਰਸ਼ਾਸਨ ਜਾਹਨਵੀ ਦੇ ਪਰਿਵਾਰ ਨੂੰ 29 ਮਿਲੀਅਨ ਡਾਲਰ (ਲਗਭਗ 260 ਕਰੋੜ ਰੁਪਏ ਤੋਂ ਵੱਧ) ਦਾ ਮੁਆਵਜ਼ਾ ਦੇਣ ਲਈ ਸਹਿਮਤ ਹੋ ਗਿਆ ਹੈ
ਕੀ ਸੀ ਪੂਰਾ ਮਾਮਲਾ?
ਜਨਵਰੀ 2023 ਵਿੱਚ, ਨੌਰਥਈਸਟਰਨ ਯੂਨੀਵਰਸਿਟੀ ਦੀ ਮਾਸਟਰਜ਼ ਵਿਦਿਆਰਥਣ ਜਾਹਨਵੀ ਕੰਡੂਲਾ ਰੋਡ ਕਰਾਸ ਕਰ ਰਹੀ ਸੀ, ਜਦੋਂ ਇੱਕ ਪੁਲਿਸ ਅਫ਼ਸਰ ਕੇਵਿਨ ਡੇਵ ਨੇ ਉਸ ਨੂੰ ਆਪਣੀ ਤੇਜ਼ ਰਫ਼ਤਾਰ ਗੱਡੀ ਨਾਲ ਟੱਕਰ ਮਾਰ ਦਿੱਤੀ।
ਰਫ਼ਤਾਰ ਦੀ ਲਾਪਰਵਾਹੀ: ਜਿਸ ਸੜਕ ‘ਤੇ ਰਫ਼ਤਾਰ ਦੀ ਸੀਮਾ 40 ਕਿਲੋਮੀਟਰ/ਘੰਟਾ ਸੀ, ਉੱਥੇ ਪੁਲਿਸ ਅਫ਼ਸਰ ਆਪਣੀ ਗੱਡੀ 119 ਕਿਲੋਮੀਟਰ/ਘੰਟਾ ਦੀ ਰਫ਼ਤਾਰ ਨਾਲ ਚਲਾ ਰਿਹਾ ਸੀ, ਉਹ ਅਫ਼ਸਰ ਇੱਕ ਡਰੱਗ ਓਵਰਡੋਜ਼ ਦੀ ਕਾਲ ‘ਤੇ ਜਾ ਰਿਹਾ ਸੀ, ਪਰ ਉਸ ਦੀ ਇਸ ਲਾਪਰਵਾਹੀ ਨੇ ਇੱਕ ਹੋਣਹਾਰ ਭਾਰਤੀ ਧੀ ਦੀ ਜਾਨ ਲੈ ਲਈ
‘ਉਸਦੀ ਜ਼ਿੰਦਗੀ ਕੀਮਤੀ ਸੀ’: ਅੰਤਰਰਾਸ਼ਟਰੀ ਪੱਧਰ ‘ਤੇ ਹੋਈ ਸੀ ਨਿੰਦਾ
ਇਹ ਮਾਮਲਾ ਉਦੋਂ ਪੂਰੀ ਦੁਨੀਆ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਜਦੋਂ ਇੱਕ ਹੋਰ ਪੁਲਿਸ ਅਫ਼ਸਰ ਡੇਨੀਅਲ ਆਰਡਰਰ ਦੀ ਬਾਡੀ-ਕੈਮਰਾ ਫੁਟੇਜ ਸਾਹਮਣੇ ਆਈ। ਵੀਡੀਓ ਵਿੱਚ ਅਫ਼ਸਰ ਜਾਹਨਵੀ ਦੀ ਮੌਤ ‘ਤੇ ਹੱਸ ਰਿਹਾ ਸੀ ਅਤੇ ਕਹਿ ਰਿਹਾ ਸੀ ਕਿ “ਉਸਦੀ ਉਮਰ 26 ਸਾਲ ਸੀ, ਉਸਦੀ ਕੀਮਤ ਸੀਮਤ ਸੀ, ਬੱਸ 11,000 ਡਾਲਰ ਦਾ ਚੈੱਕ ਕੱਟ ਦਿਓ।”
ਇਨ੍ਹਾਂ ਅਪਮਾਨਜਨਕ ਟਿੱਪਣੀਆਂ ਕਾਰਨ ਭਾਰਤ ਅਤੇ ਅਮਰੀਕਾ ਦੇ ਭਾਰਤੀ ਭਾਈਚਾਰੇ ਵਿੱਚ ਭਾਰੀ ਗੁੱਸਾ ਦੇਖਣ ਨੂੰ ਮਿਲਿਆ ਸੀ। ਬਾਅਦ ਵਿੱਚ ਉਸ ਅਫ਼ਸਰ ਨੂੰ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਸੀ।
ਸਮਝੌਤੇ ਦੇ ਵੇਰਵੇ
ਸਿਏਟਲ ਸ਼ਹਿਰ ਦੀ ਅਟਾਰਨੀ ਏਰਿਕਾ ਇਵਾਂਸ ਨੇ ਇੱਕ ਬਿਆਨ ਵਿੱਚ ਕਿਹਾ:
“ਜਾਹਨਵੀ ਦੀ ਮੌਤ ਬੇਹੱਦ ਦੁਖਦਾਈ ਸੀ। ਸਾਨੂੰ ਉਮੀਦ ਹੈ ਕਿ ਇਹ ਮੁਆਵਜ਼ਾ ਪਰਿਵਾਰ ਨੂੰ ਕੁਝ ਰਾਹਤ ਅਤੇ ਇਨਸਾਫ਼ ਦਾ ਅਹਿਸਾਸ ਦਿਵਾਏਗਾ। ਜਾਹਨਵੀ ਦੀ ਜ਼ਿੰਦਗੀ ਸਾਡੇ ਭਾਈਚਾਰੇ ਅਤੇ ਉਸਦੇ ਪਰਿਵਾਰ ਲਈ ਬਹੁਤ ਕੀਮਤੀ ਸੀ।”
ਕੁੱਲ 29 ਮਿਲੀਅਨ ਡਾਲਰ ਵਿੱਚੋਂ 20 ਮਿਲੀਅਨ ਡਾਲਰ ਬੀਮਾ ਕੰਪਨੀ ਵੱਲੋਂ ਦਿੱਤੇ ਜਾਣਗੇ ਅਤੇ ਬਾਕੀ ਰਾਸ਼ੀ ਸਿਏਟਲ ਸ਼ਹਿਰ ਖੁਦ ਅਦਾ ਕਰੇਗਾ। ਇਹ ਸਿਏਟਲ ਦੇ ਇਤਿਹਾਸ ਵਿੱਚ ਪੁਲਿਸ ਲਾਪਰਵਾਹੀ ਨਾਲ ਜੁੜੇ ਸਭ ਤੋਂ ਵੱਡੇ ਮੁਆਵਜ਼ਿਆਂ ਵਿੱਚੋਂ ਇੱਕ ਹੈ
ਪਰਿਵਾਰ ਦਾ ਸੰਘਰਸ਼
ਜਾਹਨਵੀ ਦੇ ਮਾਪਿਆਂ ਨੇ ਕਿੰਗ ਕਾਉਂਟੀ ਸੁਪੀਰੀਅਰ ਕੋਰਟ ਵਿੱਚ ਪੁਲਿਸ ਲਾਪਰਵਾਹੀ ਖ਼ਿਲਾਫ਼ ਮੁਕੱਦਮਾ ਦਾਇਰ ਕੀਤਾ ਸੀ। ਤਿੰਨ ਸਾਲਾਂ ਦੇ ਲੰਬੇ ਕਾਨੂੰਨੀ ਸੰਘਰਸ਼ ਅਤੇ ਕੂਟਨੀਤਕ ਦਬਾਅ ਤੋਂ ਬਾਅਦ ਅੱਜ ਪਰਿਵਾਰ ਨੂੰ ਇਹ ਇਨਸਾਫ਼ ਮਿਲਿਆ ਹੈ। ਜਾਹਨਵੀ ਅਮਰੀਕਾ ਵਿੱਚ ਆਪਣੇ ਸੁਪਨੇ ਪੂਰੇ ਕਰਨ ਗਈ ਸੀ, ਪਰ ਸਿਸਟਮ ਦੀ ਇੱਕ ਗਲਤੀ ਨੇ ਸਭ ਕੁਝ ਖ਼ਤਮ ਕਰ ਦਿੱਤਾ
#googlenews #Jaahnavi Kandula #googletrendingnews #trendingnews #Punjabinews
