ਟੋਕੀਓ: ਉੱਤਰੀ ਜਾਪਾਨ ਦੇ ਇਵਾਤੇ (Iwate) ਤੱਟ ‘ਤੇ ਸੋਮਵਾਰ ਸ਼ਾਮ ਨੂੰ ਆਏ 7.4 ਤੀਬਰਤਾ ਦੇ ਜ਼ਬਰਦਸਤ ਭੂਚਾਲ ਤੋਂ ਬਾਅਦ ਇਵਾਤੇ, ਆਓਮੋਰੀ (Aomori) ਅਤੇ ਹੋਕਾਈਡੋ (Hokkaido) ਸੂਬਿਆਂ ਵਿੱਚ ਸੁਨਾਮੀ ਦੀ ਚੇਤਾਵਨੀ ਜਾਰੀ ਕਰ ਦਿੱਤੀ ਗਈ ਹੈ। ਪ੍ਰਸ਼ਾਸਨ ਵੱਲੋਂ ਸਮੁੰਦਰ ਵਿੱਚ 3 ਮੀਟਰ (ਲਗਭਗ 10 ਫੁੱਟ) ਤੱਕ ਉੱਚੀਆਂ ਲਹਿਰਾਂ ਉੱਠਣ ਦਾ ਖ਼ਦਸ਼ਾ ਜਤਾਇਆ ਗਿਆ ਹੈ।
ਲੋਕਾਂ ਨੂੰ ਇਲਾਕਾ ਖਾਲੀ ਕਰਨ ਦੀਆਂ ਹਦਾਇਤਾਂ ਟੀਵੀ ਨਿਊਜ਼ ਚੈਨਲਾਂ ਰਾਹੀਂ ਸਥਾਨਕ ਨਿਵਾਸੀਆਂ ਨੂੰ ਨਦੀਆਂ ਅਤੇ ਤੱਟਵਰਤੀ ਇਲਾਕਿਆਂ ਤੋਂ ਦੂਰ, ਉੱਚੇ ਅਤੇ ਸੁਰੱਖਿਅਤ ਸਥਾਨਾਂ ‘ਤੇ ਜਾਣ ਦੀ ਲਗਾਤਾਰ ਅਪੀਲ ਕੀਤੀ ਜਾ ਰਹੀ ਹੈ। ਲੋਕਾਂ ਨੂੰ “3/11 (2011) ਦੀ ਤ੍ਰਾਸਦੀ ਨੂੰ ਯਾਦ ਰੱਖਣ” ਦੀ ਸਲਾਹ ਦਿੱਤੀ ਗਈ ਹੈ। NHK ਚੈਨਲ ‘ਤੇ ਵਿਦੇਸ਼ੀ ਨਾਗਰਿਕਾਂ ਲਈ ਅੰਗਰੇਜ਼ੀ ਭਾਸ਼ਾ ਵਿੱਚ “Tsunami! Evacuate!” (ਸੁਨਾਮੀ! ਇਲਾਕਾ ਖਾਲੀ ਕਰੋ!) ਅਤੇ “ਪਿੱਛੇ ਨਾ ਮੁੜੋ” ਵਰਗੀਆਂ ਹਦਾਇਤਾਂ ਫਲੈਸ਼ ਕੀਤੀਆਂ ਜਾ ਰਹੀਆਂ ਹਨ।
ਭੂਚਾਲ ਦੀ ਤੀਬਰਤਾ ਅਤੇ ਪ੍ਰਭਾਵ ਜਾਪਾਨ ਮੌਸਮ ਵਿਗਿਆਨ ਏਜੰਸੀ ਮੁਤਾਬਕ, ਇਹ ਭੂਚਾਲ ਸ਼ਾਮ 4:53 ਵਜੇ ਜ਼ਮੀਨ ਤੋਂ 10 ਕਿਲੋਮੀਟਰ ਦੀ ਡੂੰਘਾਈ ‘ਤੇ ਆਇਆ। ਇਸਦੀ ਸ਼ੁਰੂਆਤੀ ਤੀਬਰਤਾ 7.4 ਮਾਪੀ ਗਈ ਹੈ। ਭੂਚਾਲ ਦੇ ਝਟਕੇ ਰਾਜਧਾਨੀ ਟੋਕੀਓ ਤੱਕ ਮਹਿਸੂਸ ਕੀਤੇ ਗਏ, ਜਿੱਥੇ ਕਈ ਮਿੰਟਾਂ ਤੱਕ ਵੱਡੀਆਂ ਇਮਾਰਤਾਂ ਹਿੱਲਦੀਆਂ ਰਹੀਆਂ।
ਸੁਨਾਮੀ ਦਾ ਅਸਰ ਸ਼ੁਰੂ ਇਵਾਤੇ ਸੂਬੇ ਦੀ ਮੀਆਕੋ (Miyako) ਬੰਦਰਗਾਹ ‘ਤੇ 40 ਸੈਂਟੀਮੀਟਰ ਦੀ ਸੁਨਾਮੀ ਦੇਖੀ ਗਈ ਹੈ ਅਤੇ ਇੱਥੇ ਹੋਰ ਵੱਡੀਆਂ ਲਹਿਰਾਂ ਆਉਣ ਦੀ ਸੰਭਾਵਨਾ ਹੈ। ਹੋਕਾਈਡੋ ਦੇ ਪ੍ਰਸ਼ਾਂਤ ਤੱਟਵਰਤੀ ਇਲਾਕਿਆਂ, ਜਿਸ ਵਿੱਚ ਤੋਕਾਚੀ ਬੰਦਰਗਾਹ ਅਤੇ ਏਰੀਮੋ ਸ਼ਹਿਰ ਦੇ ਨਾਲ-ਨਾਲ ਆਓਮੋਰੀ ਦੀ ਹਾਚੀਨੋਹੇ ਬੰਦਰਗਾਹ ਸ਼ਾਮਲ ਹਨ, ਵਿੱਚ ਸ਼ਾਮ 5:40 ਤੱਕ ਸੁਨਾਮੀ ਆਉਣ ਦੀ ਭਵਿੱਖਬਾਣੀ ਕੀਤੀ ਗਈ ਸੀ।
NHK ਦੀ ਰਿਪੋਰਟ ਮੁਤਾਬਕ ਇਵਾਤੇ ਅਤੇ ਆਓਮੋਰੀ ਦੇ ਤੱਟ ਤੋਂ 60 ਕਿਲੋਮੀਟਰ ਦੂਰ ਵੀ ਸੁਨਾਮੀ ਦੇਖੀ ਗਈ ਹੈ, ਜਿਸਦਾ ਮਤਲਬ ਹੈ ਕਿ ਜਲਦੀ ਹੀ ਸੁਨਾਮੀ ਤੱਟ ਨਾਲ ਟਕਰਾਏਗੀ। ਇਵਾਤੇ ਦੇ ਕੂਜੀ (Kuji) ਇਲਾਕੇ ਦੀ ਇੱਕ ਬੰਦਰਗਾਹ ਦੀ ਲਾਈਵ ਵੀਡੀਓ ਵਿੱਚ ਛੋਟੀਆਂ ਸੁਨਾਮੀ ਲਹਿਰਾਂ ਕਾਰਨ ਸਮੁੰਦਰੀ ਜਹਾਜ਼ਾਂ ਨੂੰ ਹਿੱਲਦੇ ਹੋਏ ਸਾਫ਼ ਦੇਖਿਆ ਜਾ ਸਕਦਾ ਹੈ।
ਪ੍ਰਧਾਨ ਮੰਤਰੀ ਦਾ ਬਿਆਨ ਅਤੇ ਬਚਾਅ ਕਾਰਜ ਟੋਕੀਓ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ, ਪ੍ਰਧਾਨ ਮੰਤਰੀ ਸਨਾਏ ਤਾਕਾਇਚੀ (Sanae Takaichi) ਨੇ ਵਸਨੀਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਜਾਣ ਦੀ ਅਪੀਲ ਕੀਤੀ ਹੈ। ਉਹਨਾਂ ਕਿਹਾ, “ਇਸ ਸਮੇਂ, ਅਸੀਂ ਅਜੇ ਵੀ ਮਾਲੀ ਨੁਕਸਾਨ ਅਤੇ ਲੋਕਾਂ ‘ਤੇ ਪਏ ਪ੍ਰਭਾਵ ਦਾ ਜਾਇਜ਼ਾ ਲੈ ਰਹੇ ਹਾਂ, ਸਾਨੂੰ ਜਲਦੀ ਹੀ ਵਿਸਤ੍ਰਿਤ ਰਿਪੋਰਟਾਂ ਮਿਲਣਗੀਆਂ ਅਤੇ ਅਸੀਂ ਆਫ਼ਤ ਪ੍ਰਬੰਧਨ ਦੇ ਯਤਨਾਂ ਨੂੰ ਤੇਜ਼ੀ ਨਾਲ ਅੱਗੇ ਵਧਾਵਾਂਗੇ।”
ਸਥਿਤੀ ਨਾਲ ਨਜਿੱਠਣ ਲਈ, ਮੈਰੀਟਾਈਮ ਸੈਲਫ-ਡਿਫੈਂਸ ਫੋਰਸ (MSDF) ਨੇ ਸੰਭਾਵਿਤ ਨੁਕਸਾਨ ਦੀ ਜਾਣਕਾਰੀ ਇਕੱਠੀ ਕਰਨ ਅਤੇ ਬਚਾਅ ਕਾਰਜਾਂ ਵਿੱਚ ਮਦਦ ਲਈ ਆਪਣਾ ਇੱਕ SH-60K ਹੈਲੀਕਾਪਟਰ ਰਵਾਨਾ ਕੀਤਾ ਹੈ।
ਇਸ ਦੌਰਾਨ, ਆਵਾਜਾਈ ਸੇਵਾਵਾਂ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈਆਂ ਹਨ। ਟੋਕੀਓ ਅਤੇ ਸ਼ਿਨ-ਆਓਮੋਰੀ ਸਟੇਸ਼ਨਾਂ ਵਿਚਕਾਰ ਤੋਹੋਕੂ ਸ਼ਿਨਕਾਨਸੇਨ (Tohoku Shinkansen) ਲਾਈਨ ਨੂੰ ਰੋਕ ਦਿੱਤਾ ਗਿਆ ਹੈ। ਰੇਲ ਆਪਰੇਟਰ ਦੇ ਅਨੁਸਾਰ, ਅਕੀਤਾ ਸ਼ਿਨਕਾਨਸੇਨ ਲਾਈਨ ਨੇ ਵੀ ਆਪਣੀਆਂ ਸੇਵਾਵਾਂ ਫਿਲਹਾਲ ਮੁਅੱਤਲ ਕਰ ਦਿੱਤੀਆਂ ਹਨ।
